საქართველოს შინაგან საქმეთა მინისტრი გიორგი მღებრიშვილი გაზეთ კვირის პალიტრასთან ინტერვიუში აცხადებს, რომ თუ საქართველოს ყოფილი პრეზიდენტი, მიხეილ სააკაშვილი საქართველოში ჩამოვა, შსს კანონით დადგენილი ნორმებით იხელმძღვანელებს. მიხეილ სააკაშვილზე ამ დროისათვის ქართულ სამართალდამცავ უწყებებს ძებნა აქვთ გამოცხადებული.

გიორგი მღებრიშვილმა საგაზეთო ინტერვიუში ასევე ისაუბრა იმის შესახებ, თუ როგორ აპირებს შინაგან საქმეთა სამინისტრო არჩევნების დღეს პროვოკაციების აღკვეთას. მღებრიშვილის თქმით, სამართალდამცავები იქნებიან ყურადღებით:

"აბსოლუტურად ყველა ოლქი სამართალდამცავების ყურადღების ცენტრში იქნება მხოლოდ იმ მიზნით, რომ არჩევნებმა მშვიდ, დემოკრატიულ და უსაფრთხო გარემოში ჩაიაროს. იქ, სადაც იქნება კონფლიქტისა და დაპირისპირების საფრთხე, სამართალდამცავები ვითარების ადეკვატურად იმოქმედებენ".

გიორგი მღებრიშვილმა არ ისურვა კონკრეტულად ესაუბრა, თუ რა ტიპის საფრთხეებსა და პროვოკაციებს ელოდება შსს. მისი თქმით, სამართალდამცავი სტრუქტურები სრულიად აპოლიტიკურები არიან და მათ მთავარ მიზანს არჩევნებზე საერთო სიმშვიდისა და უსაფრთხოების უზრუნველყოფა წარმოადგენს:

რესურსებს ისე გადავანაწილებთ, რომ ნებისმიერ საარჩევნო უბანზე პოლიციის რეაგირება იყოს სწრაფი და ეფექტიანი. ამჟამად მიმდინარეობს რისკების შეფასება და შესაბამისი სამოქმედო გეგმის შედგენა".

მისივე თქმით, ბოლოდროინდელი საკანონმდებლო ცვლილებებიდან გამომდინარე, შესაძლოა, ქუჩებში 8 ოქტომბერს, არჩევნების დღეს, სამართალდამცავთა რაოდენობა თვალშისაცემი იყოს, მაგრამ ეს არ მოხდება თავად საარჩევნო უბნების ტერიტორიაზე.