ვესტეროსის მაღაზიებმა ბოლო რამდენიმე კვირაში არნახული მოგება ნახეს. ჯერ დრაკონების დედის წინ მაგიდაზე სტარბაქსის (?) ჭიქა განათავსეს, ახლა კი, ფინალურ სერიაში წყლის ბოთლი გამოჩნდა.

რაც გასაკვირი ნამდვილად არაა. რკინის ტახტისთვის 8-წლიანმა ბრძოლამ უამრავ ადამიანს გაუძლიერა წყურვილის გრძნობა.

როგორც მახვილთვალიანმა ფანებმა შენიშნეს, პლასტმასის ბოთლი იმ სცენაში ჩანს, რომელშიც პერსონაჟები ვესტეროსის ბედ-იღბალს განიხილავენ. კონკრეტულად კი, სემუელ ტარლის ტერფის უკან.

"წყლის ბოთლი მეფის სავანეში", — წერს ტვიტერის აღტაცებული მომხმარებელი.

"ღმერთო, ვერ ვსუნთქავ, მათ ეს კიდევ დაემართათ. ეს შოუ დაგვცინის", — წერს მეორე.

ამ და სხვა, უკვე ცნობილი, მიზეზების გამო, ფანები პეტიციით GOT-ის ფინალური სეზონის ხელმეორედ გადაღებას ითხოვენ. პეტიციას, რომელიც HBO-ს მიმართავს, მილიონზე მეტი ხელმომწერი ჰყავს.