არასრულწლოვანი ბიჭი ბოლნისის პოლიციის თანამშრომლებს ძალადობასა და გაუპატიურების მუქარაში ადანაშაულებს. შემთხვევა ბოლნისში მიმდინარე წლის 13 თებერვალს მოხდა.

ბიჭი ყვება, რომ პოლიციელები მისგან ბოლნისის ერთ-ერთი მაღაზიის ქურდობის აღიარებას, მოპარული ნივთების ნაწილის ადგილსამყოფელისა და თანამზრახველის დასახელებას ითხოვდნენ. როგორც ის ამბობს, ამის გამო სამართალდამცავები მას სცემდნენ და შეურაცხყოფას აყენებდნენ.

მოზარდის თქმით, პოლიციის განყოფილებაში თავიდან მას, სავარაუდოდ, პოლიციის უფროსი სცემდა, შემდეგ კი ის წავიდა და სხვა პირები სცემდნენ. გარდა ამისა, ბიჭი ამბობს, რომ "ბოთლზე დასმით" ემუქრებოდნენ, წინააღმდეგობის გაწევის დროს კი ხელი მოიტეხა.

"როდესაც ეს მითხრეს, ერთ-ერთი ადამიანი მეორე ოთახში გავიდა და გამოიტანა ბოთლი... მოვიდნენ და მეჯიკავებოდნენ, რომ სკამიდან ავეყენებინე... შარვალს როდესაც მხდიდნენ, ამ ბოთლს მადებდნენ, თან ვიდეოსაც იღებდნენ მაგ დროს. როდესაც წინააღმდეგობა გავუწიე, დამაგდეს, მცემეს, ვყვიროდი. ხელი მომტყდა, არავის სჯეროდა და უფრო მირტყამდნენ, გვატყუებსო", — ყვება არასრულწლოვანი.

ბიჭის თქმით, როდესაც პირებმა დაინახეს, რომ ხელი მოტეხილი ჰქონდა, შეეშინდათ და გაიქცნენ:

"ერთ-ერთი დარჩა, რომელმაც წამიყვანა და გზაში მაგინებდა, მირტყამდა მოტეხილ ხელში. როდესაც შევიდა საავადმყოფოში, მშობლების გარეშე არ მივიღებთო და ეს გამწარებული რომ ჩაჯდა მანქანაში, აი, რა დამმართეო, შენ გამო უნდა ვირბინოთ და ფული უნდა გადავყაროთო მეუბნებოდა. რაც ახლა იმათ გითხრეს და ვერ გააკეთეს, ახლა მე რომ მიგიყვანო, გაგაუპატიურებთ და ვიდეოსაც გადავიღებთო... რაღაც წამალი იყო, მაგას დავლევთო, ისე შენთან ვერ მოვალო", — ყვება მოზარდი.

შინაგან საქმეთა სამინისტროში On.ge-ს უთხრეს, რომ ამ საქმეზე ორი პოლიციელი უკვე გათავისუფლებულია. პროკურატურაში გამოძიება სამსახურებრივი მდგომარეობის გამოყენებით, არასრულწლოვანის მიმართ განხორციელებული წამების ბრალდებით საქართველოს სისხლის სამართლის კოდექსის 1441-ე მუხლის მეორე ნაწილის "ა", "ბ", "ე" და "ზ" ქვეპუნქტებით მიმდინარეობს. არასრულწლოვანი პროკურატურამ დაზარალებულად უკვე სცნო.

უწყებაში On.ge-ს განუცხადეს, რომ არასრულწლოვნის მშობლებმა შემთხვევის შესახებ ერთი თვის შემდეგ განაცხადეს, რის გამოც მტკიცებულებების ამოღება ვერ მოხერხდა. პროკურატურაში აცხადებენ, რომ ამ ეტაპზე არ დაუდგენიათ, თუ ვინ სცემა ბავშვი.