პარლამენტის დეპუტატი უმრავლესობიდან ზაქარია ქუცნაშვილი ამტკიცებს, რომ მისთვის მიუღებელია სექსისტური გამონათქვამები და ადამიანის შეურაცხყოფა. თუმცა თინა ბოკუჩავას მიმართ ზუგდიდის საკრებულოს თავმჯდომარის მოადგილის მიერ გამოთქმული მოსაზრების შეფასებისას ამბობს, რომ ადამიანი "რასაც დასთეს, იმას მოიმკის".

ზუგდიდის საკრებულოს თავმჯდომარის მოადგილის გამოთქმის შეფასებისას On.ge-სთან საუბრისას ქუცნაშვილმა ყურადღება ნაციონალური მოძრაობის მიერ გამოთქმულ შეურაცხმყოფელ ტერმინოლოგიაზე გაამახვილა:

"ქალბატონი თინა ხშირ შემთხვევაში თავადაც არღვევს ხოლმე ამ სტანდარტს. აღარ ვლაპარაკობ მის თანაპარტიელებზე... ობიექტურობა მოითხოვს, რომ ყველა, ვინც უხამსობას და სექსიზმს გამოიყენებს იყოს გაკიცხული".

კითხვაზე, მისი ნათქვამი წაახალისებს თუ არა თინა ბოკუჩავას მიმართ აგრესიას, ქუცნაშვილი პასუხობს, რომ "არა".

"რასაც დასთეს, იმას მოიმკიო. ეს იმას არ ნიშნავს, რომ ვინც ამას სთეს, იმას აუცილებლად პასუხი გასცე არანაკლებ შეურაცხმყოფელად", — დასძინა მან.

ზუგდიდის საკრებულოს თავმჯდომარის მოადგილე თაზო ფაცაციამ ნაციონალური მოძრაობის დეპუტატი თინა ბოკუჩავა სექსისტურ და შეურაცხმყოფელ კონტექსტსში მოიხსენია. თაზო ფაცაცია On.ge-სთან ადასტურებს, რომ ეს პოსტი ნამდვილად მან დაწერა. ფაცაცია ამბობს, რომ მისი ნათქვამი სექსისტური და შეურაცხმყოფელი არ არის

ამავე თემაზე: თამარ ჩუგოშვილი ზუგდიდის საკრებულოს თავმჯდომარის მოადგილის სექსისტურ განცხადებას ემიჯნება