ღვინის ეზო რესტორნების ქსელის წისქვილი ჯგუფი ახალი ობიექტია, რომელიც 10 მაისს მომხმარებლისთვის უკვე კარგად ნაცნობ მისამართზე, ბელიაშვილის #99-ში გაიხსნა.

ეს არის საქართველოში პირველი სანახაობრივი სივრცე, სადაც სტუმრებს კულინარიისა და თეატრის საინტერესო სინთეზის ნახვა შეუძლიათ.

რესტორნის ინტერიერი ჭეშმარიტი თბილისური ეზოს ნიმუშია, ხოლო არქიტექტურა და დიზაინი ქართველი თავადის სახლისთვის დამახასიათებელი დეტალებისგან შეიქმნა.

სპეციალურად ახალი სივრცისთვის მასპინძლებმა ხალხური რეწვის ნიმუშები საქართველოს სხვადასხვა კუთხიდან ჩამოიტანეს.

მხოლოდ ღვინის ეზოში შეუძლიათ სტუმრებს უგემრიელესი ტრადიციული კერძების დაგემოვნებისას ძველ თბილისში იმოგზაურონ და იმ ეპოქის ამბების უშუალო მონაწილეები გახდნენ. ამისთვის კომპანიამ ორიგინალური პროექტი შექმნა, რომელიც სარესტორნო სივრცეში თეატრალური წარმოდგენის გამართვას გულისხმობს.

წისქვილი ჯგუფმა, რეჟისორ გოგა მაისურაძისა, სხვადასხვა დასის მსახიობებისგან შემდგარ გუნდთან და სიმებიან კვარტეტთან ერთად, რომელსაც ოთო ნასრაშვილი ხელმძღვანელობს, სტუმრებს პირველი მიუზიკლის პრემიერა გახსნის ღონისძიებაზე წარუდგინა. ეს არის ყველასთვის საყვარელი სპექტაკლის ხანუმას ადაპტირებული ვერსია, რომელიც კინოს, თეატრისა და ოპერის ელემენტების ჰარმონიული შერწყმით შეიქმნა.

დადგმის უნიკალურობა მის ინტერაქციულ ხასიათშია, რაც მთელი წარმოდგენის განმავლობაში, მსახიობებსა და სტუმრებს შორის უშუალო კონტაქტში გამოიხატება.

"ნამდვილად ამბიციური და საინტერესო პროექტია, რომელშიც სიამოვნებითა და დიდი პასუხისმგებლობით ჩავერთე. დადგმის ინსპირაცია თავად რესტორნის სივრცე გახდა, რომელიც ძველი თბილისელი თავადის სახლის ნიმუშია. სწორედ აქედან წამოვიდა იდეა, რომ იმ ეპოქის ყველაზე ცნობილი და საყვარელი სპექტაკლის „ხანუმას“ ადაპტირებული ვერსია გაკეთებულიყო. საქართველოში აღნიშნულ პროექტს ანალოგი არ აქვს. შესაბამისად, ვფიქრობ, რომ როგორც ქართველებისთვის, ისე ტურისტებისთვის ეს სიახლე შთამბეჭდავი იქნება", — აცხადებს რეჟისორი გოგა მაისურაძე.

ხანუმა უკვე რესტორნის პროგრამაშია და მისი ნახვა სტუმრებს კვირაში 2-ჯერ შეეძლებათ.

უახლოეს მომავალში ახალ სივრცეში კიდევ ერთი სპექტაკლის დადგმა იგეგმება. ღვინის ეზო იქნება სივრცე, რომელიც მომხმარებელს მუდმივად შესთავაზებს სიახლეებს, წარმოდგენებსა და საინტერესო ღონისძიებებს.

როგორც კომპანიაში აცხადებენ, უახლოეს მომავალში სხვადასხვა კუთხის ძველი ქართული კერძების აღდგენას და მათს ახალ მენიუში შეტანასაც აპირებენ. ესეც სპეციალურად ღვინის ეზოსთვის გაკეთდება და სტუმრები მათ მხოლოდ ამ რესტორანში დააგემოვნებენ.

ღვინის ეზოს მრავალფუნქციური ღია სივრცე 200-230 პერსონაზეა გათვლილი და უკვე მზადაა მათ მისაღებად. აქ მსურველებს ყოველდღიურად მობრძანებაც შეეძლებათ და ნებისმიერი სახის წვეულებისა და ღონისძიების გამართვაც. გარდა ამისა, მომხმარებლის მოთხოვნის შესაბამისად, ახალი სივრცის როგორც სრულად, ისე ნაწილობრივ დახურვაც იქნება შესაძლებელი.