სახალხო დამცველმა, უჩა ნანუაშვილმა დემურ სტურუას თვითმკვლელობამდე მიყვანაში ბრალდებული, გოდერძი თევზაძე ქუთაისის ციხეში მოინახულა.

სახალხო დამცველმა პირადად ბრალდებულისგან მოისმინა საქმის დეტალები. გოდერძი თევზაძე თავს დამნაშავედ არ ცნობს და უკვე მეათე დღეა შიმშილობს. ნანუაშვილმა ბრალდებულს შიმშილობის შეწყვეტისკენ მოუწოდა.

საქართველოს სახალხო დამცველის აპარატი განაგრძობს გოდერძი თევზაძის საქმის შესწავლას და ამ საკითხთან დაკავშირებით სასამართლო პროცესებზე დასწრებასაც გეგმავს.

22 წლის დემურ სტურუამ 7 აგვისტოს სამტრედიის რაიონში თავი მოიკლა. გარდაცვლილმა დატოვა წერილი, რომელშიც წერია რომ მასზე ერთ-ერთი პოლიციელი ზეწოლას ახორციელებდა.

სამსახურებრივი უფლებამოსილების ძალადობით გადამეტებისა და თვითმკვლელობამდე მიყვანის ჩადენაში ბრალდებული, ძებნაში მყოფი გოდერძი თევზაძე 13 სექტემბერს ნებაყოფლობით გამოცხადდა საგამოძიებო ორგანოში.

მისი სასამართლო სხდომა 15 სექტემბერს გაიმართა და მოსამართლემ ის წინასწარ პატიმრობაში დატოვა.