ინფრასტრუქტურის მინისტრი, მაია ცქიტიშვილი ფიქრობს, რომ რუსთავი 2-ზე არანაირი შეტევა არ მიმდინარეობს. ამის შესახებ მან დღეს, 7 მაისს რუსთავი 2-თან საუბარში განაცხადა:

"შევაფასებ, როგორც მორიგ სცენარს რუსთავი 2-ის მხრიდან, წარმოაჩინოს, თითქოს რაღაც შეტევას აქვს ადგილი", — აცხადებს მინისტრი არხის წინააღმდეგ შეტანილ ახალ დავაზე და ამ აზრის გასამყარებლად აღნიშნავს, რომ ტელევიზიას შეუზღუდავი საშუალება აქვს, გამოხატოს საკუთარი აზრი:

"მეტსაც გეტყვით, მათი აზრის გამოხატვა სცდება ყველანაირ ეთიკურ და მორალურ ღირებულებებს. მათ შორის, ლანძღვა და გინება პირდაპირი ეთერიდან".

ნიკა გვარამიამ 6 მაისს საგანგებო ბრიფინგი გამართა, სადაც თქვა, რომ ტელეკომპანიის წილის ცხრა პროცენტის მფლობელი, ნინო ნიჟარაძე სხვა მეწილეებისგან 26 მილიონს ითხოვს. ის ამბობს, რომ სარჩელით ნიჟარაძემ სასამართლოს მიმართა. გვარამია ამ ყველაფერს ტელევიზიაზე შეტევის ახალ ფაზად აფასებს.

გვარამია აცხადებს, რომ ამ ყველაფრის მიზანი რუსთავი 2-ის სარედაქციო პოლიტიკის შეცვლაა და ეს სარჩელი კონკრეტულად მას, ამ ყველაფრის გარანტს ეხება. გვარამია ამბობს, რომ მთავარი მოთხოვნა მისი, როგორც დირექტორის, უფლებამოსილების შეწყვეტა იქნება, რაც ქართულმა სასამართლომ ივანიშვილის დავალებით ბევრჯერ სცადა.