"მე ჩემი ნებით რომ წავსულიყავი, ალბათ, განცხადებას დავწერდი, რადგან განცხადება არ დავწერე, ითვლება, რომ გადამაყენეს", — ამის შესახებ ეკონომიკის ყოფილმა მინისტრმა, გიორგი ქობულიამ შაბათის კურიერთან ინტერვიუში განაცხადა.

ის ამბობს, რომ ხელისუფლების ასე სწრაფად დატოვებას არ აპირებდა. ქობულიას თქმით, მინისტრობისას მას მიაჩნდა, რომ მისი აზრები და ხედვები სწორი იყო. ის აცხადებს, რომ გადადგომამდე ბიძინა ივანიშვილს შეხვდა და შეეცადა, ის თავისი ხედვების სისწორეში დაერწმუნებინა.

"ხედვებში არ მოხდა თანხმობა ჩემსა და მმართველი პოლიტიკური პარტიის ხელმძღვანელობას შორის. ის პრინციპები, რაზეც მეგონა, რომ ჩემი მინისტრობის დასაწყისში შევთანხმდით, ჩემი აზრით, არ გამართლდა. ამას მოყვა ის, რაც მოხდა", — ამბობს ქობულია.

მისივე განცხადებით, კონკრეტული გადაწყვეტილებების მიღების ნელი ტემპი მასსა და მმართველი გუნდის ხელმძღვანელობას შორის კამათის მიზეზი ხშირად ხდებოდა.

"ის გადაწყვეტილებები, რომლებიც მე მიმაჩნდა სწორედ და რომელიც მიმართული იყო ქვეყნის და ხალხის საკეთილდღეოდ, ძალიან ჭიანურდებოდა. ამ გადაყწვეტილებების მიღების ძალიან ნელი ტემპი ჩვენი კამათის ერთ-ერთ ძირითადი მიზეზი ხდებოდა", — აღნიშნავს ყოფილი მინისტრი.

პრემიერ-მინისტრმა, მამუკა ბახტაძემ გიორგი ქობულიას გათავისუფლების შესახებ ბრძანებას ხელი 18 აპრილს მოაწერა.