დღეს კეთილი კაცის ისტორიას მოგიყვებით, რომელიც დაბადებიდან სმენდაქვეითებულია და რომელმაც ასევე სმენის პრობლემის მქონე პატარა ლეკვი შეიფარა და გაზარდა.

31 წლის ნიკმა თავისი ახალი ოჯახის წევრი ცხოველების ერთ-ერთი თავშესაფრიდან წამოიყვანა და მას შემდეგ ისინი ერთად და ბედნიერად ცხოვრობენ.

ექვსი კვირის ემერსონი თავიდან ფლორიდაში, ერთ-ერთ თავშესაფარში ცხოვრობდა. ცხოველს სერიოზული ინფექციური დაავადება დაემართა და სამწუხაროდ, სმენაც დაკარგა — ბევრი პრობლემისა მიუხედავად, ის მაინც ძალიან იღბლიანი აღმოჩნდა.

თავშესაფრის ერთ-ერთი თანამშრომელი მიხვდა, რომ ემერსონს განსაკუთრებულად მზრუნველი პატრონი სჭირდებოდა და გადაწყვიტა, რომ ასეთი ადამიანი ინტერნეტით, კონკრეტულად კი ფეისბუქის პოსტის მეშვეობით მოეძებნა.

"ემერსონი ისევ ეძებს პატრონს, ძალიან გთხოვთ გააზიაროთ ეს პოსტი", — წერდა ლინდსი ფეისბუქზე.

აი, ასე გაიცნო ლინდსიმ რეიჩელ ებოტი, ნიკ ებოტის დედა, რომელიც დღეს უბედნიერესია თავისი შვილისა და უსაყვარლესი შინაური ცხოველის, ემერსონის განსაკუთრებული ურთიერთობით.

"ისინი კარგად უგებენ ერთმანეთს და განსაკუთრებულად მაგარია ის, რომ ემერსონი ყოველთვის ახერხებს ნიკს გაუგოს", — ამბობს რეიჩელი.

ნიკი, რეიჩელი და ემერსონი

ფოტო: Nick Abbott

ნიკი და ემერსონი უკვე განუყრელი მეგობრები არიან

მიუხედავად იმისა, რომ ძაღლს სმენის პრობლემა აქვს, ნიკი არაჩვეულებრივად ახერხებს მასთან ჟესტების ენით ურთიერთობას — ძაღლმა უკვე იცის დაჯდომა, დაწოლა და მოსვლა, როდესაც ნიკი თავს აქნევს კი ემერსონი დაუყოვნებლივ ყეფას იწყებს.

ბენდიერებაა, რომ სამყაროში არსებობენ კეთილი ადამიანები, რომლებიც უმწეო და დაუცველი ცხოველების დასახმარებლად და მათ გასაბენდიერებლად ძალისხმევას არ იშურებენ.

ჩვენ კი ისღა დაგვრჩენია, რომ ემერსონსა და მის მზრუნველ პატრონს ძალიან ბედნიერი და ხალისიანი ცხოვრება ვუსურვოთ.