საგარეო საქმეთა მინისტრის, დავით ზალკალიანის განცხადებით, დავით გარეჯის სამონასტრო კომპლექსის ცალკეულ ნაწილებზე, დადგენილი პრაქტიკის გათვალისწინებით, გადაადგილება შეუფერხებლად განხორციელდება.

მინისტრის თქმით, მიღწეულია შეთანხმება, რომ უახლოეს დღეებში დასრულდება სადელიმიტაციო კომისიის განახლებული შემადგენლობის დაკომპლექტება და განახლდება ერთობლივი სადელიმიტაციო კომისიის მუშაობა.

"მინდა ყველას ვთხოვო, რომ გაითვალისწინონ საკითხის სენსიტიურობა და დელიკატურობა, განსაკუთრებული გულისყურით მოვეკიდოთ ამ თემას. დარწმუნებული ვარ, რომ საკითხი პოზიტიურად გადაწყდება", — აღნიშნა ზალკალიანმა.

როგორც საგარეო უწყების ხელმძღვანელმა განმარტა, რომ ამ საკითხზე, ასევე სხვა თემებზე მიიღება ისეთი გადაწყვეტილებები, რომელიც "შეეფერება ორი ერის მეგობრობას და სტრატეგიულ პარტნიორობას".

დავით გარეჯის უდაბნოს მონასტრამდე მისასვლელი გზა 4-დღიანი ჩაკეტვის შემდეგ დროებით 25 აპრილს გაიხსნა. აზერბაიჯანელი მესაზღვრეები აცხადებდნენ, რომ კლდეში ნაკვეთ სამონასტრო კომპლექსამდე ხალხს მხოლოდ აღდგომის დღესასწაულზე შეუშვებენ, მომდევნო კვირიდან კი შესაძლებელია გზა ისევ ჩაკეტონ. საგარეო საქმეთა სამინისტრომ და საზღვრის დაცვის სამსახურმა, ამ საკითხთან დაკავშირებით აზერბაიჯანულ მხარესთან კომუნიკაცია დაიწყო. სამინისტროს ცნობით, აზერბაიჯანელი მესაზღვრეების მხრიდან ქედს მიღმა მთამსვლელი ნაკადის შეიზღუდა.