დემურ სტურუას თვითმკვლელობამდე მიყვანაში ბრალდებული, გოდერძი თევზაძე უკვე მეცხრე დღეა შიმშილობს და ამბობს, რომ უდანაშაულოა. თევზაძის ადვოკატი, ლედი ტუკვაძე კი განმარტავს, რომ მისი დაცვის ქვეშ მყოფი შიმშილობის შეწყვეტას არ აპირებს:

"ის ამბობს, რომ ბოლომდე იბრძოლებს იმისთვის, რომ მისი უდანაშაულობა დაამტკიცოს. ჩვენ უკვე წერილობითი მოთხოვნები გავაგზავნეთ და ის ითხოვს სახალხო დამცველის აპარატის წარმომადგენლებთან, ადამიანის უფლებათა კომიტეტის თავჯდომარესთან ან მისი კომიტეტის რომელიმე წარმომადგენელთან შეხვედრას".

22 წლის დემურ სტურუამ 7 აგვისტოს სამტრედიის რაიონში თავი მოიკლა. გარდაცვლილმა დატოვა წერილი, რომელშიც წერია რომ მასზე ერთ-ერთი პოლიციელი ზეწოლას ახორციელებდა.

სამსახურებრივი უფლებამოსილების ძალადობით გადამეტებისა და თვითმკვლელობამდე მიყვანის ჩადენაში ბრალდებული, ძებნაში მყოფი გოდერძი თევზაძე 13 სექტემბერს ნებაყოფლობით გამოცხადდა საგამოძიებო ორგანოში.

მისი სასამართლო სხდომა 15 სექტემბერს გაიმართა და მოსამართლემ ის წინასწარ პატიმრობაში დატოვა.