თბილისის მერის კახა კალაძის თქმით, პრეზიდენტი სალომე ზურაბიშვილი ქართულ ოცნებასთან არ უნდა გაიგივდეს, რადგან ის პარტიის წევრი არაა. კალაძემ ამის შესახებ მას შემდეგ განაცხადა, რაც ჟურნალისტებმა მას ამერიკული ბაზების განთავსებაზე პრეზიდენტის განცხადებასთან დაკავშირებით ჰკითხეს.

"მას არანაირი კავშირი არ აქვს ქართულ ოცნებასთან. ის არის დამოუკიდებელი კანდიდატი, ეს იყო ჩვენი გადაწყვეტილება, რომ მხარი დაგვეჭირა დამოუკიდებელი კანდიდატისთვის. ჩვენ ვაკვირდებოდით მოვლენებს, თუ ვინ იქნებოდა ასეთი კანდიდატი, რადგან სალომე ზურაბიშვილი იყო ერთადერთი, ღირსეული კანდიდატი, პარტიამ მიიღო გადაწყვეტილება, დაეჭირა მხარი. შესაბამისად, ჩემი თხოვნა იქნება, პარტიასთან ნუ გავაიგივებთ ქალბატონ სალომე ზურაბიშვილს", — განაცხადა თბილისის მერმა.

საქართველოს პრეზიდენტმა, სალომე ზურაბიშვილმა ამერიკის ხმასთან ინტერვიუში თქვა, რომ საქართველოში ამერიკული სამხედრო ბაზის აშენება, შესაძლოა, პროვოკაციად იქნას აღქმული. ზურაბიშვილმა განაცხადა, რომ მას "არ ჰგონია", საქართველოში ამერიკული ბაზის აშენება რეკომენდირებული იყოს.