საქართველოს მეხუთე პრეზიდენტს, სალომე ზურაბშვილს "არ ჰგონია" რომ საქართველოში ამერიკული სამხედრო ბაზის აშენება რეკომენდირებული იქნება. ამის შესახებ მან ამერიკის ხმასთან ინტერვიუში განაცხადა. მისი თქმით, საქართველოს მდებარეობიდან გამომდინარე, საჭიროა, უსაფრთხოება გაძლიერდეს და არ გადაიდგას ისეთი ნაბიჯები, რომლებმაც, შესაძლოა, სხვების რეაქციის პროვოცირება გამოიწვიოს:

"არაა საჭირო გადავდგათ ნაბიჯები, რომლებიც შეიძლება, პროვოკაციად იქნას აღქმული და ამასთან, არ მგონია, შეერთებული შტატები აქ სამხედრო ბაზის ქონისთვის მზად იყოს, რაც ყურადღებას მიიქცევს არა მხოლოდ რუსეთისგან, არამედ ტერორისტული მოძრაობებისგანაც, რომლებიც ჩვენს რეგიონში ძალიან აქტიური არიან".

სალომე ზურაბიშვილი ფიქრობს, რომ აშშ-სთან სტრატეგიული ურთიერთობა ღრმავდება შავ ზღვაში ამერიკის საზღვაო ძალების გემების რაოდენობის გაზრდით:

"მიმაჩნია, რომ შავი ზღვა ამერიკის სტრატეგიულ ხედვაშ უფრო და უფრო მნიშვნელოვანი ხდება. ჩვენ შავი ზღვის აქეთა სანაპიროზე ვართ, მეორე მხარეს, რა თქმა უნდა, ნატოს პარტნიორები რუმინეთი და ბულგარეთი არიან. ჩვენ ვემზადებით იმისთვის, რომ შავი ზღვა ჩვენსა და ამერიკის შეერთებულ შტატებს შორის უფრო მნიშვნელოვანი დამაკავშირებელი გახდეს. სტრატეგიული პარტნიორობის გასაღრმავებლად ეს ერთ-ერთი გზაა. და რა თქმა უნდა, პირდაპირი სამხედრო ურთიერთობა შეერთებულ შტატებთან და ნატოსთან იმისთვის, რომ მეტად მოვემზადოთ თავდაცვის სფეროში".