სააპელაციო სასამართლოში, დღეს 21 სექტემბერს, 13:00 საათზე ე.წ. კაბელების საქმის განხილვა დაიწყება. ჯერჯერობით უცნობია რა შინაარსის შუამდგომლობებს დააყენებენ მხარეები. პარტია თავისუფალი დემოკრატების ლიდერი ირაკლი ალასანია მედიასთან საუბრისას აღნიშნავს, რომ მიუხედავად სასამართლოზე განხორციელებული ზეწოლისა, ისინი ყველაფერს ეცდებიან დაკავებულების გასათავისუფლებლად:

"ვიცით, რომ ეს სასამართლო კონტროლირდება პოლიტიკური ხელმძღვანელების მხრიდან, მურუსიძის მხრიდან, მაგრამ ჩვენ ბოლომდე ამოვწურავთ ყველა სამართლებრივ შესაძლებლობას, რომ ტყვეობაში აყვანილი ხუთი უდანაშაულო, პატრიოტი ადამიანი გამოვიყვანოთ ციხიდან და დავუბრუინოთ საკუთარ ოჯახებს".

საქმე ეხება თავდაცვის სამინისტროს მიერ განხორციელებულ ე.წ. კაბელების პროექტს, რომლისთვისაც 2013 წელს სახელმწიფოს სარეზერვო ფონდიდან 6 720 877 ლარი გამოიყო, თუმცა პროკურატურის მტკიცებით, აღნიშნული პროექტის განხორციელებისათვის მხოლოდ 2 618 005 ლარი იყო საჭირო. სწორედ ამ რიცხვებს შორის სხვაობის - 4 102 872 ლარის გაფლანგვას ედავება პროკურატურა უკვე მსჯავრდებულ 5 პირს.

თბილისის საქალაქო სასამართლომ ე.წ. კაბელების საქმეზე თავდაცვის სამინისტროს 5 ყოფილი მაღალჩინოსანი 16 მაისს ბიუჯეტის თანხების გაფლანგვაში დამნაშავედ ცნო და სასჯელად თავისუფლების 7 წლით აღკვეთა მიუსაჯა.

ე.წ. კაბელების საქმის შესახებ, მეტი ინფორმაციის გაგება შეგიძლიათ ჩვენი სტატიიდან.