საქართველოს ენერგეტიკის განვითარების ფონდის ცნობით, ქარის პირველი ელექტროსადგურის სამშენებლო სამუშაოები უკვე დასრულებულია.

ელექტროსადგური შედგება 6 ქარის ტურბინისგან, თითოეულის სიმძლავრე კი 3,45 მეგავატია. ელექტროსადგურის ტესტირება ოქტომბერ-ნოემბრის თვეების განმავლობაში განხორციელდება საერთაშორისო სტანდარტების მიხედვით, რათა მოხდეს შერჩეული ტურბინის მიმართ ენერგიის გამომუშავების შემოწმება. ქარის ტურბინების დამონტაჟებას ახორციელებს მსოფლიო ბაზარზე ლიდერი, მიმწოდებელი კომპანია ვესტას ბენილუქსი.

შპს ქართლის ქარის ელექტროსადგური წარმოადგენს სახელმწიფოს შვილობილ კომპანიას. 2016 წლის 11 იანვარს, შპს ქართლის ქარის ელექტროსადგურსა და ევროპის რეკონსტრუქციის და განვითარების ბანკს შორის გაფორმდა სესხის ხელშეკრულება, რომლის საფუძველზეც $24 მილიონი გამოიყო პროექტის დასაფინანსებლად.

ევროპაში განახლებადი წყაროებისგან მიღებული ენერგიის საერთო რაოდენობამ 2014 წლისთვის 16 პროცენტს მიაღწია, რაც იმას ნიშნავს, რომ ეს ტენდენცია იზრდება. ევროკავშირის მიერ დაწესებული დირექტივის მიხედვით, 2020 წლისათვის წევრი ქვეყნების ენერგომოხმარების 20 პროცენტი განახლებადი ენერგიის წყაროებისგან უნდა იყოს მიღებული. ევროკავშირთან ასოცირების ხელშეკრულების გაფორმებით, უკვე საქართველოსაც მოეთხოვება რომ განახლებადი ენერგია აითვისოს და გამოიყენოს.

გაიგეთ მეტი ქარის ენერგიის, მისი ეფექტიანობისა და საქართველოში მისი გამოყენების პოტენციალის შესახებ ჩვენი სტატიიდან.