სამოქალაქო აქტივისტებმა პანკისის მოსახლეობის სოლიდარობის ნიშნად პარლამენტთან აქცია კიდევ ერთხელ გამართეს. მათი თქმით, ხელისუფლებამ უნდა შეწყვიტოს რეპრესიული პოლიტიკა და არ დააკავონ და არ აღძრან საქმეები პანკისელების წინააღმდეგ.

აქციის ერთ-ერთმა ორგანიზატორმა, ლაშა ჩხარტიშვილმა აქციაზე მოთხოვნები წამოაყენა.

"ხელი არავის დააკარონ პანკისის მოსახლეობაში. დამნაშავე ეძებონ საკუთარ რიგებში. ჰესებზე უარი უნდა ითქვას, მით უმეტეს პანკისში. მეტი ღია ფორმა იმისა, რომ ყველა წინააღმდეგია. უნდა იყოს ფორმა, რომ პლებისციტი არსებობდეს მცირე ჰესზე. მესამე მოთხოვნაა — გახარიას და თურნავას გადადგომა", — თქვა ჩხარტიშვილმა.

პანკისის მოსახლეობის მხარდამჭერი აქცია თბილისსა და ბათუმში გუშინაც გაიმართა. გუშინ, 21 აპრილის დილას პანკისის ხეობაში, სოფელ ბირკიანში აქციის მონაწილეებსა და პოლიციას შორის დაპირისპირება მოხდა. სპეცრაზმმა აქციის მონაწილეების წინააღმდეგ ცრემლსადენი გაზი და რეზინის ტყვიები დღის განმავლობაში ორჯერ გამოიყენა. ადგილობრივები ამბობენ, რომ ჰესების, კერძოდ მდინარე ალაზანზე "ხადორი 3"-ის მშენებლობის გაგრძელების უფლებას არავის მისცემენ. მათი თქმით, მშენებლობის შემთხვევაში, ხეობის უნიკალური ეკოლოგიური სისტემისა და სოციალური გარემოს დაზიანების მაღალ რისკებია.