საქართველოს პრეზიდენტი, სალომე ზურაბიშვილი პანკისის ხეობაში ადგილობრივებსა და სპეცრაზმელებს შორის მომხდარ დაპირისპირებას გამოეხმაურა. პრეზიდენტი ფეისბუკის საკუთარ გვერდზე წერს, რომ ერთადერთი გზა შეთანხმებაა:

"მზად ვარ, ჩემი კომპეტენციის ფარგლებში, ყველაფერი ვიღონო, რათა დაცული იქნას, როგორც მთლიანად სახელმწიფოს, ისე თითოეული ადამიანის კანონიერი ინტერესები".

დღეს, 21 აპრილის დილას პანკისის ხეობაში, სოფელ ბირკიანში აქციის მონაწილეებსა და პოლიციას შორის დაპირისპირება მოხდა. ადგილობრივი მედიის პანკისის სათემო რადიოს ინფორმაციით, სპეცრაზმმა აქციის მონაწილეების წინააღმდეგ ცრემლსადენი გაზი და რეზინის ტყვიები გამოიყენა. დაშავებულია რამდენიმე მოქალაქე. ადგილობრივები ამბობენ, ჰესების, კერძოდ მდინარე ალაზანზე "ხადორი 3"-ის მშენებლობის გაგრძელების უფლებას არავის მისცემენ.

გრძელდება ასობით ადამიანის პროტესტი, კვლავ მობილიზებულია სპეცრაზმი და პოლიციის ტექნიკა, მათ შორის წყლის სატყორცნი მანქანები.