პაატა ბურჭულაძემ ტელეკომპანია პირველში განაცხადა, რომ ივანიშვილი ცრუობს, როცა ამბობს, რომ ის 3 წელია აღარ უნახავს.

"მას შემდეგ, რაც ვითომ დიდი თანხა ვთხოვე და ნაწყენი იყო ჩემზე, ის ამბობს, რომ ამის შემდეგ სამი წელი არ ვუნახივარ. მასთან სახლშიც ვიყავი. საუბარი გვქონდა პატრიარქის კონცერტებზე პარიზში, ამის მერე ჩვენ არ შევხვედრივართ კარგი ხანი და მაგის მერე დამირეკა და ურეკში დამპატიჟა თავისთან, ვსაუბრობდით ფესტივალის ჩატარებაზე, გია ხუხაშვილიც ესწრებოდა შეხვედრას, მაშინ შენდებოდა ის არენაც. მაგის შემდეგ შევხვდით ბადრი პატარკაციშვილის 60 წლისთავზე, გამოქანდა ჩემსკენ და ერთმანეთი გადავკოცნეთ. რა წყენაზეა ლაპარაკი, არაფერი წყენა არ ყოფილა, ახლა კიდე გაახსენდა რაღაცები... იცით რა არის? მე უბრალოდ არ მესმის, ამ ადამიანს ყველაფერი ეპატიება?"

ბურჭულაძე აცხადებს, რომ ამ და სხვა ტყუილებისთვის ბიძინა ივანიშვილმა მას ბოდიში უნდა მოუხადოს.

ივანიშვილმა, 12 სექტემბერს, ტელეკომპანია GDS-ის ეთერში, იმერეთის რეგიონის ჟურნალისტებთან შეხვედრისას განაცხადა, რომ ბურჭულაძესთან პარტნიორობის მცდელობა ჰქონდა:

"მე სამი წელია ეს კაცი არ მინახავს. ნაწყენი ვიყავი იმიტომ, რომ თავის დროზე როცა ვთხოვე გვერდით დაგვიდექი, უამრავი ფული მოითხოვა და შეურაცხყოფილი იყო, უარი ვუთხარი."