საქართველოს პარლამენტში უზენაესის მოსამართლეთა არჩევის შესახებ კანონპროექტის განხილვა მეორე მოსმენით დღეს, 17 აპრილს არის დაგეგმილი. დეპუტატები პარლამენტის თავმჯდომარეს სთხოვენ გადაიდოს განხილვა, რადგან მათ არ აქვთ ვენეციის კომისიის დასკვნის მიხედვით განახლებული კანონპროექტი.

ევროპული საქართველოს დეპუტატი, ელენე ხოშტარია ფიქრობს, რომ ქართულმა ოცნებამ უნდა გამოაქვეყნოს დოკუმენტი, სადაც ასახული იქნება ვენეციის კომისიის რომელ რეკომენდაციებს ითვალისწინებენ და ამის შემდეგ დაიწყოს განხილვა.

"ბატონო ირაკლი, თქვენ მოგმართავთ პირადად, როგორც პარლამენტის თავმჯდომარეს, პარლამენტის თავმჯდომარეობა არ ნიშნავს შემაღლებულზე ჯდომას ან ინსტრუქციების მიღებას და აქ გატარებას, როდესაც დეპუტატები გეუბნებიან ყველა მხრიდან, რომ განხილვისთვის საჭიროა [კანონპროექტის] გაცნობა გადადეთ ეს საკითხი, დაურეკეთ ამ ბიძინა ივანიშვილს შეუთანხმდით და გადადეთ საკითხი", — განაცხადა ელენე ხოშტარიამ.

პარლამენტის სხდომაზე შესვენება გამოცხადდა. საქართველოს პარლამენტის თავმჯდომარეს არ დაუკონკრეტებია წარუდგენს თუ არა დეპუტატებს განახლებულ კანონპროექტს.

ვენეციის კომისიის რეკომენდაციები უზენაესის მოსამართლეთა დანიშვნის წესებთან დაკავშირებით უკვე ცნობილია. დოკუმენტი 14-გვერდიანია და 68 პუნქტს მოიცავს. საპარლამენტო უმრავლესობა ირწმუნება, რომ დასკვნა პოზიტიურია, არასამთავრობო სექტორი და ოპოზიცია კი მიიჩნევს, რომ ვენეციის კომისია მოსალოდნელზე მეტად კრიტიკული იყო. საქართველოს პარლამენტის თავმჯდომარე კომისიის დასკვნებთან დაკავშირებით უკვე შეხვდა არასამთავრობო სექტორს, დიპლომატიურ კორპუსს და დეპუტატებს. რეკომენდაციები პარლამენტის პლენარულ სხდომაზე უნდა განიხილონ.

გაიგე მეტი: