შინაგან საქმეთა სამინისტროს ინფორმაციით, ჯგუფურად ჩადენილი გამოძალვის ბრალდებით წარსულში მრავალჯერ ნასამართლევი ორი პირი დააკავეს.

უწყების ცნობით, ბრალდებულები სოფელ დიღომში მცხოვრებ მოქალაქეს ყოფილი თანამშრომლის ვალის დაბრუნების მოტივით დაუკავშირდნენ და 2 500 ლარის გადახდა მოსთხოვეს. თანხის გადაუხდელობის შემთხვევაში კი მისი და მისი ოჯახის წევრების სიცოცხლის მოსპობით დაემუქრნენ. ბრალდებულებმა მას ფული ერთ-ერთი მათგანის მეუღლის ანგარიშზე ჩაარიცხინეს.

საქმეზე გამოძიება სისხლის სამართლის კოდექსის 181-ე მუხლის მე-2 ნაწილის "ა" ქვეპუნქტით და მე-3 ნაწილის "ბ" ქვეპუნქტით მიმდინარეობს, რაც ორჯერ ან მეტჯერ ნასამართლევი პირის მიერ ჯგუფურად ჩადენილ გამოძალვას გულისხმობს. ჩადენილი დანაშაული ოთხიდან ცხრა წლამდე პატიმრობას ითვალისწინებს.