სახელმწიფო აუდიტის ინფორმაციით, 2016 წლის აპრილში პოლიტიკურმა პარტიებმა შემოწირულობების სახით ჯამში იმაზე მეტი თანხა მიიღეს, ვიდრე იანვარში, თებერვალსა და მარტში ერთად აღებული.

წარმოდგენილი მონაცემების თანახმად, 2016 წლის აპრილში პოლიტიკურმა პარტიებმა სულ 604,747 ლარის ოდენობის შემოწირულობა მიიღეს, ამავე წლის გასული 3 თვის განმავლობაში კი ჯამში 428 476 ლარი.

შემოწირული თანხის ოდენობით პირველ ადგილზე პატრიოტთა ალიანსია, რომელმაც აპრილში სულ 268,379 ლარი მიიღო. პარტიას ყველაზე დიდი თანხა - 60,000 ლარი მანუჩარ მაჩაიძემ გადაურიცხა, რომელიც ამავე პარტიის წევრია.

პატრიოტთა ალიანსის შემდეგ ყველაზე დიდი ოდენობის შემოწირულობა - 149,020 ლარი პარტიამ ქართული ოცნება-დემოკრატიული საქართველო მიიღო. მესამე ადგილს კი, ახალი პოლიტიკური ცენტრი - გირჩი იკავებს, რომელსაც შემოწირულობების სახით აპრილში 124 ათასი ლარი გადაურიცხეს.

გარდა ზემოაღნიშნული პირველი სამეულისა, აპრილში შემოწირულობების რაოდენობა სხვადასხვა პარტიებს შორის ასე გადანაწიდლა:

  • რესპუბლიკური პარტია - 1,131 ლარი.
  • გაერთიანება ბედნიერი საქართველოსთვის - 46,939 ლარი.
  • საქართველო მშვიდობისთვის - 3,173 ლარი.
  • ერთიანი ნაციონალური მოძრაობა - 900 ლარი.
  • თავისუფალი საქართველო - 1,364 ლარი.
  • დემოკრატიული მოძრაობა-ერთიანი საქართველო - 600 ლარი.
  • კონსერვატორული პარტია - 120 ლარი.
  • ქრისტიან-კონსერვატორული პარტია - 9,000 ლარი.

სახელმწიფო აუდიტის 2016 წლის აპრილის ანგარიშში ვერ მოხვდნენ ეროვნული ფორუმი და თავისუფალი დემოკრატები, რადგან ამ თვეში მათ შემოწირულობები საერთოდ არ მიუღიათ.