საქართველოს პარლამენტის ადამიანის უფლებათა კომიტეტის თავმჯდომარემ სოფო კილაძემ TV პირველის ეთერში კიდევ ერთხელ განმარტა, ბავშვთა უფლებათა კოდექსში ჩანაწერი, რომლის მიხედვითაც ბავშვს სექსუალური განათლების მიღება მშობლის ნებართვით შეეძლება.

სოფო კილაძემ ბავშვის კოდექსში ამ ჩანაწერის დასასაბუთებლად ორი მაგალითი მოიყვანა. ერთი ხატია ახალაიას სექსუალურ გაკვეთილებს ეხება, რომელიც სოციალურ ქსელში ვრცელდება, ხოლო მეორე არაფორმალური განათლების ფარგლებში სექსუალური განათლების გაკვეთილებს.

სოფო კილაძემ გაიხსენა შემთხვევა, როცა ბავშვთა და ახალგაზრდობის ეროვნულმა ცენტრმა მანავის "მომავლის ბანაკის" მესამე დღის სატრენინგო სესია გურამ ფალავანდიშვილის მიმართვის საფუძველზე შეაჩერა.

საქმე ეხება ფეისბუქგვერდ "ზნეობაზე" გავრცელებულ წერილს, სადაც გურამ ფალავანდიშვილს მშობლის სტატუსით მიმართა ბანაკის აქტივობებით უკმაყოფილო ბადრი დავითურმა. ფეისბუქგვერდ "ზნეობაზე" გავრცელებული წერილის ავტორი დისკრიმინაციული ტერმინებით აღწერდა სატრენინგო აქტივობებს და წერდა, რომ მის შვილს უტარდებოდა "გაკვეთილები, რომელიც მიდრეკილი იყო მრუშობისკენ, გარყვნილებისკენ და უკუღმართობისკენ".

სოფო კილაძემ TV პირველის ღამის ეთერში თქვა: "კანონპროექტის მიზანი არის, რომ მაგალითად რომელიმე არასამთავრობომ თუ გადაწყვიტა რომ გააკეთოს არაფორმალური განათლების ფარგლებში სქესობრივი აღზრდის გაკვეთილები, ან ბანაკში იყოს სადმე, სადაც ეს ბავშვები მიდიან მშობლის მეთვალყურეობის გარეშე - რომ არ მოხდეს ასეთი შემთხვევა, რომ რომელიმე არასამთავრობომ ან ექსპერტმა არ შემოიტანოს ესეთი გაკვეთილები, ამის აღკვეთა რომ მოხდეს და თუ ასეთი შემოთავაზება იქნება მშობლის ფილტრი გაიაროს".

მან ასევე განაცხადა, რომ სექსუალურ განათლების შესახებ გარკვეულ ინფორმაციას სკოლის მოსწავლები ბიოლოგიის გაკვეთილზე მაინც იღებენ.

ადამიანის უფლებათა დაცვის კომიტეტის თავმჯდომარემ, სოფო კილაძემ პარლამენტში, ბავშვთა კოდექსის განხილვაზე თქვა, რომ სქესობრივი აღზრდის გაკვეთილები მხოლოდ მშობლის თანხმობით იქნება დაშვებული.

კილაძის თქმით, თუ ოჯახი მოითხოვს კონკრეტულ კრიზისულ შემთხვევებში მართლმადიდებელ ეკლესიას ან სხვა კონფესიებს, მათ უფლება ექნებათ, ჩაერთონ და კონსულტაციები გაიარონ ამ საკითხთან დაკავშირებით.