30-წლიანი ეჭვის შემდეგ დადასტურდა, რომ ზეთის საღებავებით შესრულებული ყაყაჩოების სადავო ნახატი ვან გოგს ეკუთვნის. მასზე კვლევა ნიდერლანდელმა მეცნიერებმა ჩაატარეს.

ნამუშევარი კონექტიკუტის მუზეუმში ინახებოდა. ლარნაკი ყაყაჩოებით — ასე ჰქვია ნახატს, რომელიც 1886 წლით თარიღდება.

ამსტერდამში მდებარე ვან გოგის მუზეუმის მკვლევრების თქმით, გენიალურმა მხატვარმა ნახატი პარიზში გადასვლის შემდეგ შექმნა. ნამუშევარი 1957 წლიდან ამერიკის შტატ კონექტიკუტში მდებარე ათენეუმის მუზეუმს ეკუთვნის.

ვინსენტ ვან გოგის "ლარნაკი ყაყაჩოებით"

ფოტო: Wadsworth Atheneum Museum of Art / Associated Press

ნახატის ავთენტურობის შესახებ კითხვები 1990 წლის შემდეგ გაჩნდა, როდესაც ისტორიკოსმა უოლტერ ფინჩილფელმა განაცხადა, რომ მსოფლიოს მასშტაბით უამრავი ნახატი ნიდერლანდელი მხატვრის სახელით იყო წარმოდგენილი. ამის შემდეგ, "ლარნაკი ყაყაჩოებით" მუზეუმიდან გაიტანეს და არქივში შეინახეს.

წლების შემდეგ, როდესაც ტექნოლოგიები განვითარდა და ვან გოგის ნამუშევრის ამოცნობა შესაძლებელი გახდა, მუზეუმმა გადაწყვიტა ნახატისთვის გადაეხედა.

ის სწორედ ათენეუმის მუზეუმში შეისწავლეს, როდესაც ციფრული X-ray ტექნოლოგიით აღმოაჩინეს, რომ ნახატის უკან სხვა ნამუშევარიც იყო, რომელიც ვან გოგის ავტოპორტრეტს ჰგავდა. ამან ნამუშევარს უტყუარობა კიდევ უფრო მეტად შესძინა.

ამის შემდეგ, ამსტერდამში მდებარე ვან გოგის მუზეუმმა ნახატის შექმნისას გამოყენებული მასალები და მისი სტილი შეისწავლა და დაასკვნა, რომ ნამუშევრის ავტორი ნამდვილად ვინსენტ ვან გოგი იყო. ნახატი სტილისტურადაც ჯდება ყვავილების იმ სხვა ნამუშევრებში, რომლებიც ვან გოგს პარიზში ჩასვლის შემდეგ ეკუთვნის.

ათენეუმის კოლექციაში ახლა ვან გოგის ორი ორიგინალია. მეორე მათგანი ნიდერლანდელი ფერმწერის ავტოპორტრეტია.

"ლარნაკი ყაყაჩოებით" ამერიკის მუზეუმში 26 აპრილს გამოიფინება.