ინდონეზიის გასართობ პარკში ქალთევზების ქანდაკებებს ოქროსფერი ტოპები "ჩააცვეს". პარკის ადმინისტრაცია განმარტავს, რომ ამით აღმოსავლურ ტრადიციულ ღირებულებებს იცავს.

ქალაქ ჯაკარტაში, Ancol Dreamland-ის პარკში ქალთევზების მკერდმოშიშვლებული ქანდაკება ბოლო 15 წელია დგას. როგორც BBC წერს, ქანდაკებების "ჩაცმას" კრიტიკა მოჰყვა და საზოგადოების ნაწილი ამბობს, რომ პარკი გარე ზეწოლის მსხვერპლი გახდა. ადმინისტრაცია კი აღნიშნავს, რომ ქანდაკებების მკერდის დაფარვის გადაწყვეტილება ერთი წლის წინ მიიღეს და მათზე ზეწოლა არ ყოფილა.

ქანდაკებების ავტორი, დოლორეს სინაგაგა გამოცემასთან ამბობს, რომ ადმინისტრაციამ ვიზიტორებს ხელოვნებისადმი წვდომა შეუზღუდა.

ფოტო: Adek Berry / AFP / Getty Images

ეს პირველი შემთხვევა არაა, როდესაც ქანდაკებების "ჩაცმა" გადაწყვიტეს. 2016 წელს რომში ირანის პრეზიდენტის, ჰასან რუჰანის ვიზიტისას კაპიტოლიუმის მუზეუმებში ანტიკურ ქანდაკებების "სიშიშვლე" დაფარეს.