მართალია ჯიმ კერიმ წლევანდელ ოქროს გლობუსზე შოუთაიმის სერიალში Kidding შესრულებული როლისთვის ნომინაცია მიიღო, თუმცა ეს სულაც არ ნიშნავს იმას, რომ ის ჯილდოებითა და ცერემონიების სეზონით დიდად არის დაინტერესებული.

გარდა ამისა, კომედიური, თუ დრამატული როლების საკმაოდ წარმატებით შესრულების მიუხედავად, მას ოსკარზე არც ერთი ნომინაცია არ აქვს. შესაძლოა, სწორედ ეს იყო მიზეზი, როცაVanity Fair-თან ინტერვიუში ოსკარების სეზონს დიდი სანაგვე უწოდა.

"დაჯილდოებების სეზონზე ძირითადად ბიზნეს ინტერესები აქვთ. ეს ყველაფერი გიგანტური სანაგვეა... ერთი ვახშამიც რომ გააცდინო, შანსებს სრულიად კარგავ. არასდროს ვყოფილვარ დაინტერესებული ამ საშინელ თამაშში მონაწილეობით", - ამბობს მსახიობი.

მსახიობი წინასაოსკარე კამპანიის მაგალითებსაც იხსენებს.

"ერთადერთხელ იყო მომენტი, როდესაც მითხრეს, რომ შემეძლო ოსკარის ნომინაცია მიმეღო და მითხრეს რა უნდა გამეკეთებინა ამისთვის. ვერ მივხვდი ამდენი შეხვედრები, მუდმივად ყურადღების ცენტრში ყოფნა, ვახშმები, სადილები, ლანჩები რა საჭირო იყო. ისედაც ბევრ ადამიანს ვხვდები და ნუთუ ეს საკმარისი არაა?", - ყვება კერი.

თუ მსახიობის კარიერას გადავხედავთ, იქ ნამდვილად ვიპოვით ისეთ ფილმებს, მაგალითად Man on the Moon, The Truman Show და Eternal Sunshine of the Spotless Mind, რომლისთვისაც მსახიობი ოსკარის ნომინაციას იმსახურებდა.