ლუიზიანას სახელმწიფო უნივერსიტეტის ფიზიკისა და ასტრონომიის დეპარტამენტის პროფესორმა ტომას კორბიტმა და მისმა გუნდმა ოთახის ტემპერატურაზე კვანტური რადიაციის წნევის დაფიქსირება და გაზომვა შეძლო. როგორც წესი, კვანტური ეფექტების დაფიქსირება ძალიან დაბალ ტემპერატურებზე ხდება, თუმცა კორბიტმა კოლეგებთან ერთად შექმნა ფიზიკური მოწყობილობა, რომელიც ამას ოთახის ტემპერატურაზეც ახერხებს.

მის მიერ შექმნილი მოწყობილობა ნემსის წვერის ზომის პაწაწინა სარკეებისგან შედგება, რომლებიც გამონაშვერ კოჭაზეა ჩამოკიდებული. ექსპერიმენტის მსვლელობისას სარკეზე ლაზერის სხივი ეცემა, რომელიც ირეკლება, ამ დროს წარმოიქმნება რადიაციის წნევა, რომელიც გამოშვერილი კოჭის სტრუქტურას არხევს, რითაც საბოლოოდ სარკე ირყევა და ხმოვანი ბგერები წარმოიქმნება.

ფოტო: Elsa Hahne, LSU

აღნიშნული კვლევა ეროვნული სამეცნიერო ფონდის (NSF) მიერ იყო დაფინანსებული და მისი შედეგები მიანიშნებს იმ მეთოდებზე, რომლითაც შესაძლოა გრავიტაციული ტალღების დეტექტორების გაუმჯობესება მოხდეს.

"გრავიტაციული ტალღების დეტექტორებში ძალიან მგრძნობიარე სისტემები გამოიყენება, ამის გათვალისწინებით, მნიშვნელოვანია შევისწავლოთ, თუ რა როლს თამაშობს კვანტური რადიაციის წნევა ამ მოწყობილობებსა და ისეთ დეტექტორებში, როგორიც არის, მაგალითად, LIGO", - აცხადებს კორბიტი.

"ექსპერიმენტის ფარგლებში ლუიზიანას უნივერსიტეტში ყოველდღიურად სხვადასხვა საქმეს ვასრულებდი, ვათავსებდი სარკეებსა და ოპტიკურ მოწყობილობებს, ვერ ვიაზრებდი, თუ რამხელა შედეგი შეიძლება მოჰყოლოდა ამ კვლევას. გასაოცარია, რომ კვლევის ფარგლებში ჩვენ შევძელით და კვანტური მექანიკის პროცესები, რომლებიც თითქოს ჩვენი ყოველდღიური ცხოვრებიდან ძალიან შორსაა, თვალით აღქმადი გავხადეთ. ჩამოკიდებული სარკეების რხევა, რომლის დანახვაც შეუიარაღებელი თვალით შეგვიძლია, სწორედ კვანტური პროცესების მიერ არის გამოწვეული", - აცხადებს კვლევის მთავარი ავტორი ჯონათან კრიპე.

მიღებული შედეგები მეცნიერებს გრავიტაციული ტალღების დეტექტორების გაუმჯობესების საშუალებას მისცემს.

კვლევა აჟურნალ Nature-ში გამოქვეყნდა.