პარტია სახელმწიფო ხალხისთვის ლიდერმა პაატა ბურჭულაძემ, ტელეკომპანია რუსთავი 2-ის ეთერით კომენტარი გააკეთა მისი და ტელეკომპანიის გენერალური დირექტორის ნიკა გვარამიას სატელეფონო ჩანაწერის გავრცელებასთან დაკავშირებით. მისი თქმით, ჩანაწერი ნამდვილად ავთენტურია, თუმცა დამონტაჟებული:

"შევეგუე იმას, რომ მისმენენ და მარტო გვისმენენ კი არა, ჩვენზე ზემოქმედებენ, ჩვენზე ზეწოლა არის, ჩვენზე ყველაფერი ხდება. რაც კი შეიძლება მოხდეს საერთოდ ვინმეზე, ხდება ჩვენს პარტიაზე, მაგრამ არაფერია, გავუძლებთ, რაც მეტია დაწოლა, მით მეტია წინააღმდეგობა. ჩვენ წინააღმდეგობას გავაძლიერებთ. ეს მოულოდნელი არ ყოფილა. მე ვადასტურებ რომ ეს საუბარი ნამდვილია და რომ ამოჭრილია, სადაც მე ბატონ ნიკას ვუთხარი, რომ არ ვარ არც ნაციონალური მოძრაობის, არც ქართული ოცნების, რომ მე ვარ ხალხის წარმომადგენელი."

ტელეკომპანია რუსთავი 2-ის გენერალური დირექტორი ნიკა გვარამია ასევე აცხადებს, რომ ნამდვილად ღია ხაზზე ესაუბრა პაატა ბურჭულაძეს, რადგან მისივე თქმით, დასამალი არაფერი ჰქონდა. იგი თავისი სატელეფონო ჩანაწერის გავრცელებაში სახელმწიფო უსაფრთხოების სამსახურს ადანაშაულებს.

სახელმწიფო უსაფრთხოების სამსახურმა On.ge-სთან საუბარში განაცხადა, რომ უწყება უარყოფს გვარამიას ბრალდებას. აღნიშნულ საქმეზე, შსს-მ უკვე დაიწყო გამოძიება.