ძალა ვნებს არჩევნებს - ასე ეწოდება ახალ კამპანიას, რომელშიც როგორც სახელისუფლებო, ისე ოპოზიციური პარტიები არიან ჩართული. კამპანიის მიზანია, პოლიტიკურმა სუბიექტებმა გააცნოებიერონ, თუ რა ზიანი მოაქვს ძალადობას არჩევნების წინ.

როგორც იუსტიციის მინისტრმა, თეა წულუკიანმა განმარტა, კამპანია უწყებათაშორისი კომისიის ეგიდით ტარდება:

"შევთავაზეთ, უწყებათაშორისი კომისიის ეგიდით, პოლიტიკურ პარტიებს, რომ არჩევნებზე ძალადობის წინააღმდეგ, ერთი და იმავე, ერთ და არა რამდენიმე, ერთ რგლოში ყველა პარტია, მათი ლიდერები და ცნობილი სახეები გაერთიანებულიყვნენ ერთ მიზნის გარშემო. დავგმოთ პარტიებმა ყველამ ერთად და ერთი ინტენსივობით ძალადობა არჩევნების პროცესისას".

როგორც ქართული დასის ლიდერმა, ჯონდი ბაღათურიამ განაცხადა, ქვეყნის გარეთაც და ქვეყნის შიგნითაც, საქართველოს სჭირდება გონივრული და არა ძალისმიერი გადაწყვეტილებები:

"ამისთვის ჩვენ ყველამ ყველაფერი უნდა გავაკეთოთ, რომ შევინარჩუნოთ მშვიდობა, სტაბილურობა და ქვეყის განვითარება. ჩვენ არ უნდა დავუშვათ ძალადობა".

კამპანიაში 11 საარჩევნო სუბიექტია ჩართული, ვიდეო რგოლის გადაღება კი 14 სექტემბერს დაიწყო.