მასწავლებლის გლობალური ჯილდოს ფინალისტმა, ლადო აფხაზავამ ჯილდოს მფლობელს პიტერ ტაბიჩს გამარჯვება მიულოცა და აღნიშნა, რომ "მისი გამოცდილება და სიტყვა ყველაზე მეტად სჭირდება სამყაროს".

აფხაზავამ მადლობა გადაუხადა გულშემატკივარს და სამომავლო გეგმებზე ისაუბრა. მისი თქმით, მიზნად დაისახა მეტი საერთაშორისო ცოდნა და გამოცდილება მოიზიდოს საქართველოში. მისივე თქმით, ამისთვის ქვეყანას გლობალური ჯილდოს მფლობელი პიტერ ტაბიჩიც ეწვევა.

"მეც თავს გამარჯვებულად ვგრძნობ, რადგან შევძელი მსოფლიოსათვის გადამეცა ქართველი მასწავლებლის სათქმელი. მე მოვახერხე ჩემი ქვეყნის სახელი გამეტანა მსოფლიოს წინაშე", — წერს აფხაზავა ფეისბუქგვერდზე.

ლადო აფხაზავამ მასწავლებელთა გლობალური ჯილდო ვერ მოიპოვა. პრიზი კენიელ მასწავლებელს, პიტერ ტაბიჩის ერგო.

აფხაზავა მასწავლებელთა გლობალური ჯილდოზე 179 ქვეყნის წარმომადგენლის 10 000 განაცხადიდან შეარჩიეს. მალევე ის საუკეთესო 50 მასწავლებლის სიაში მოხვდა და საბოლოოდ, ფინალისტების ათეულში.

ფინალამდე აფხაზავა ამბობდა, რომ გამარჯვება აუცილებელი არ არის და თავად უკვე გამარჯვებულია, რადგან ამ კონკურსს დამარცხებული არასდროს ჰყოლია.

აფხაზავას მიღებული აქვს საქართველოს მასწავლებლების ეროვნული ჯილდო, მენტორი მასწავლებლის სტატუსი და ამავდროულად ის არის გლობალური ჯილდოსა და ვარკის ფონდის ელჩი.

გაიგეთ მეტი აფხაზავაზე: