მასწავლებელთა გლობალური ჯილდოს მფლობელი კენიელი მასწავლებელი პიტერ ტაბიჩი გახდა. ის აფრიკაში მათემატიკასა და ფიზიკას ასწავლის.

"ყოველ დღე აფრიკაში ჩვენ ვშლით ახალ გვერდს, ახალ თავს. დღეს კიდევ ერთი დღეა. ეს ჯილდო არა ჩემი, არამედ დიდებული კონტინენტის ახალგაზრდობის აღიარებაა. მე დღეს აქ მარტო იმის წყალობით ვარ, რასაც ჩემმა მოსწავლეებმა მიაღწიეს. ეს პრიზი აძლევს მათ შანსს. ეს ეუბნება სამყაროს, რომ მათ ყველაფრის გაკეთება შეუძლიათ", — თქვა ტაბიჩიმ ჯილდოს მიღების შემდეგ.

მასწავლებელთა გლობალური ჯილდოს მომზადებული ვიდეოდან ვიგებთ, რომ ტაბიჩი კერიკოს საშუალო სკოლაში ძველი მოპედით დადის და შემოსავლის 80 პროცენტს ადგილობრივ ორგანიზაციებს ურიცხავს. ამბობს, რომ მასწავლებლობა მისი მოწოდებაა და სისხლში აქვს, რადგან მამამისი, ბიძა და ბიძაშვილებიც მასწავლებლები იყვნენ.

ტაბიჩი ჰყვება, რომ მოსწავლეები სკოლაში შორი გზიდან დადიან და ხშირად კვების პრობლემა აქვთ, რაც მათ კონცენტრაციაში უშლით ხელს. სწორედ ამიტომ, ის ასწავლის ადგილობრივებს როგორ მოიყვანონ სხვადასხვა მარცვლეული და მოამარაგონ ოჯახები.

მათემატიკისა და ფიზიკის გარდა, ტაბიჩი მოსწავლეებს სპორტსა და სიმღერაშიც ავარჯიშებს.

ნახეთ ვიდეო პიტერ ტაბიჩის შესახებ და გაიცანით გლობალური ჯილდოს მქონე მასწავლებელი.