ფეხბურთის ისტორიაში ბევრს ვერ იპოვით ისეთს, ვისთვისაც კლუბს ძეგლი აქვს აღმართული. ასეთი აღიარების მისაღწევად ფეხბურთელისთვის მხოლოდ კარგი თამაში არ არის საკმარისი - ის უნდა იყოს სამაგლითო პიროვნება, ფანების დიდი სიყვარულით სარგებლობდეს და ისტორია ჰქონდეს დაწერილი თავისი კლუბისთვის.

ასეთი ადამიანების სიაში დევიდ ბექჰემიც აღმოჩნდა, რომლისთვისაც ლოს-ანჯელეს გალაქსიმ ძეგლის დადგმა გადაწყვიტა. ამ ამბავის გარშემო დიდი მითქმა-მოთქმა დაიწყო. ყველას აინტერესებდა, როგორი იქნებოდა ბექჰემის ძეგლი, მითუმეტეს რონალდუს სკანდალური ბიუსტის შემდეგ.

რონალდუს სკანდალური ბიუსტი, რომელიც მოგვიანებით აიღეს.

რონალდუს სკანდალური ბიუსტი, რომელიც მოგვიანებით აიღეს.

ფოტო: BBC

ვაღიაროთ, რომ ბექჰემის სახის ნაკვთების რეალისტურად გადმოტანა, საკმაოდ რთულია. ეს შესაძლებლობა ხელიდან არ გაუშვა ცნობილმა კომიკოსმა ჯეიმს კორდენმა, რომელმაც დევიდ ბექჰემის ძეგლის ოფიციალურ გახსნამდე, ინგლისელი ფეხბურთელი მწარედ დატროლა.

კომიკოსმა დევიდის ალტერნატიული ძეგლი შექმნა, რომელიც ფეხბურთელს ექსკლუზიურ დახურულ ჩვენებაზე აჩვენეს. ძეგლი ნამდვილად კატასტროფული იყო და ოდნავადაც არ ჰგავდა ინგლისელ ფეხბურთელს. დიდი ყბა, უზარმაზარი უკანალი, სხვადასხვა მხარეს გაშვერილი თვალები, არაპროპორციული ხელები — მოკლედ, ყველაფერი საშინელი იყო.

ბექჰემის რეაქციამ მოლოდინს გადააჭარბა. ინგლისელი ფეხბურთელი ძალიან გაბრაზდა და ემოციებს ვერ მალავდა, მაგრამ სიმშვიდეს მაინც ინარჩუნებდა. მოგვიანებით, მან მოითხოვა რომ კამერები გასულიყვნენ, რათა პირისპირ გასაუბრებოდა ძეგლის შემქმნელსა და კლუბის წარმომადგენელს.

"ჩემმა შვილებმა რომ ეს ნახონ, ტირილს დაიწყებენ... გამორიცხულია, რომ ამ ძეგლმა დღის სინათლე იხილოს. ეს სამარცხვინოა", - ამბობდა გაბრაზებული ბექჰემი.

გალაქსის საწყობის თანამშრომელმა ბექჰემის ყალბი ძეგლი დაუნდობლად გაანადგურა, რისთვისაც მან დევიდისგან მადლობაც მიიღო. მოგვიანებით გამოჩნდა ჯეიმს კორდენიც და ინგლისელისთვის ყველაფერი ნათელი გახდა.

აი, ასე გამოიყურება სინამდვილეში ბექჰემის ძეგლი, რომელიც გალაქსის მოედნის წინ დაიდგმება.

დევიდ ბექჰემი ამერიკულ გუნდში 2007 წლიდან 2012 წლამდე თამაშობდა. მან გალაქსის შემადგენლობაში 118 მატჩი ჩაატარა და 20 გოლის გატანა მოახერხა.