კოალიცია მედიის ადვოკატირებისთვის წევრი ორგანიზაციები ეხმაურებიან პროკურატურის მიერ გასაჯაროებულ "გახარიას წერილს", სადაც TV პირველისა და არტარეას სარედაქციო პოლიტიკის შეცვლაზეა საუბარი. კოალიცია მიიჩნევს, რომ წერილის ავთენტურობის დადასტურების შემთხვევაში ის მედიის საქმიანობაში ჩარევა და სარედაქციო დამოუკიდებლობის ხელყოფის მცდელობაა.

"მნიშვნელოვანია, როგორც ამ მაუწყებელმა, ისე ყველა სხვა მედიასაშუალებამ იცოდეს, რომ მათი სარედაქციო დამოუკიდებლობა დაცულია კანონით. ჟურნალისტებს უნდა ჰქონდეთ რწმენა, რომ მათ შეუძლიათ პროფესიული საქმიანობის თავისუფლად განხორციელება, რომ ისინი არ გახდებიან ინსტრუმენტი სხვადასხვა პირთა ინტერესების სასარგებლოდ", — ვკითხულობთ განცხადებაში.

კოალიცია მოუწოდებს საქართველოს პროკურატურას, განსაკუთრებული ყურადღებით გამოიძიოს მედიასაშუალებებზე შესაძლო ზეწოლის ფაქტები და გამოძიება მაქსიმალურად მოკლე ვადებში ეფექტიანად წარმართოს.

გახარიას წერილი

4 მარტს პარლამენტში მამუკა ხაზარაძემ განაცხადა, რომ არჩევნების წინ შინაგან საქმეთა მინისტრ გიორგი გახარიასგან მუქარის წერილი მიიღო, რომლის მიხედვითაც, მოთხოვნების შეუსრულებლობის შემთხვეევაში დაუნგრევდნენ რეპუტაციას ქვეყანაში და საერთაშორისო ასპარეზზე.

საქართველოს მთავარმა პროკურატურამ ხაზარაძის მიერ მტკიცებულებად გადაცემული დოკუმენტი გუშინ 6 თებერვალს გაასაჯაროვა. წერილში საუბარია იმაზე, რომ TV პირველს იმედის მსგავსი სარედაქციო პოლიტიკა უნდა ჰქონდეს.

"უახლოეს 5 დღეში TV1 უნდა დაჯდეს TV იმედის ტრენდზე, გადავიდეს მაუწყებლობის საგანგებო რეჟიმზე (ეს უნდა დავინახოთ არხის სარედაქციო პოლიტიკიდან)", — ნათქვამია წერილში.