თიბისი ჯგუფმა და ფრანგულმა სოსიეტე ჟენერალმა ხელი მოაწერეს შეთანხმებას, რომლის თანახმადაც თიბისი ბანკი სოსიეტე ჟენერალის 100%-იანი წილიდან ბანკ რესპუბლიკას აქციების 93,64%-ს 315 მილიონ ლარად შეიძენს.

"ამ გარიგებით თიბისი ბანკი ბაზარზე #1 ბანკი ხდება დეპოზიტებისა და სესხების მიხედვით" - აცხადებენ ბანკში.

თიბისის ცნობით, აღნიშნული ტრანზაქცია უდიდესი იქნება ქართული საბანკო სექტორის ისტორიაში.

თიბისი ბანკი სოსიეტე ჟენერალს 315 მილიონ ლარის 70%-ს ნაღდი ანგარიშსწორებით გადაუხდის, ხოლო 30%-ს თიბისი ბანკის ახლადგამოშვებული აქციებით. შედეგად, ჯგუფი სოსიეტე ჟენერალი ხდება თიბისი ბანკის აქციების 5,4% -ის მფლობელი, რაც მას თიბისის ერთ-ერთ მსხვილ აქციონერად აქცევს.

თიბისი ბანკის ინფორმაციით, ბანკ რესპუბლიკას აქციების დარჩენილი 6,36% ევროპის რეკონსტრუქციისა და განვითარების ბანკს ეკუთვნის და მათ გამოსყიდვაზე მოლაპარაკებები უკვე დაწყებულია.

ტრანზაქციის დასრულება 2016 წლის ბოლომდეა დაგეგმილი.