ბევრი ადამიანისთვის ყოველდღიური ცხოვრებისა და კომუნიკაციის ასპექტები არც ისეთი მარტივია, როგორც ერთი შეხედვით ჩანს. წვეულებებზე თუ სამსახურში გამუდმებით ვაწყდებით უხერხულ სიტუაციებს, რომელთა თავიდან არიდებაც მარტივად შეიძლებოდა. სწორედ ამიტომ, Reddit-ის მომხმარებლებმა გადაწყვიტეს, საკუთარი საიდუმლო ხრიკები მთელი სამყაროსთვის გაეზიარებინათ:

1. თუ რომელიმე კაფეში ან რესტორანში საჭმელი ძალიან მოგეწონა, სთხოვე მიმტანს, რომ მენეჯერს დაუძახოს და მასაც გაუზიარე შთაბეჭდილება. როგორც წესი, მომხმარებლებს მენეჯერის ნახვა მაშინ უნდათ, როცა პრეტენზია აქვთ, მაგრამ იგივეს გაკეთება შექებისთვისაც შეიძლება. ამით ყველას ერთად გაახარებ და მადლიერმა მენეჯერმა შეიძლება საჩუქრად სასმელიც გაჩუქოს.

2. ხალხმრავალ ადგილას გადაადგილებისას ამოირჩიე წერტილი, რომლისკენაც მიემართები. გაკვირვებული დარჩები, როგორ შემოგეცლებიან ადამიანები და გზას დაგითმობენ.

3. არავინ აჩერებს ადამიანს, რომელსაც პიცა მიაქვს. ასე კონცერტების ბექსთეიჯზეც შეგიძლია შეღწევა.

4. ერთადერთი სწორი პასუხი კომპლიმენტზე არის "მადლობა". შემდეგ კი, თუ საუბრის გაგრძელება გინდა, შეგიძლია კომენტარიც დაურთო: ვინმეს შენი კაბა მოეწონა? "მადლობა, ჯიბეებიც აქვს". ნამუშევარი შეგიქეს? "მადლობა, დიდხანს ვმუშაობდი ამაზე". ამით არა მხოლოდ თავდაჯერებული გამოჩნდები, არამედ სხვებსაც აგრძნობინებ, რომ მართლები არიან. კომპლიმენტის საპასუხოდ შებრძოლება საერთოდაც არაა ზრდილობიანი.

5. თუ სამსახურში რამე საქმეს ვერ უმკლავდები, უბრალოდ თქვი, რომ "ვერ აკეთებ". ზედმეტად ახსნა და იმის მოყოლა, რამდენი რამ სცადე უშედეგოდ, შენზე უფრო ცუდად მეტყველებს. თუ მიზეზებს მოიყვან, რატომ იყო შეუძლებელი დავალების შესრულება, დიდი შანსია, ეს მიზეზები სათითაოდ გადაამოწმონ.

6. როცა ვინმე სწორ რამეს გეუბნება, თქვი არა "ვიცი", არამედ "მართალი ხარ". ამით, მეორე ადამიანს თავს კარგად აგრძნობინებ იმის აღნიშვნის გარეშე, რამდენად შორსმჭვრეტელი და ბრძენი ხარ.

7. თუ მენეჯერი რაიმეს გაკეთებას გთხოვს და მოგაფიქრდება, რომ ცოტა მეტის გაკეთება ან დავალების უკეთესად შესრულება შეგიძლია, არ გაამხილო. ნაკლებს დაპირდი და მეტი გააკეთე. მერე კი დააკვირდი აღფრთოვანებულ სახეს. ეს საქმიან მოლაპარაკებებზეც ვრცელდება.

8. თუ წვეულებაზე ვინმეს სახელი დაგავიწყდა, არადა აუცილებელია, რომ სხვას გააცნო, ასეთი გამოსავალი არსებობს: მიმართე იმ ადამიანს, ვისი სახელიც დაგავიწყდა; გამარჯობა, ეს ჩემი მეგობარი XXXX-ა, ამის შემდეგ კი ის თვითონ ეტყვის სახელს შენს მეგობარს.

9. თუ სამსახურში ყოველთვის 15 წუთით ადრე მიხვალ, თითქმის ყველაფერს გაპატიებენ: მეტ შესვენებას მოსაწევად, ფეისბუქის სქროლვას და ასე შემდეგ, საკმარისია კვირაში რამდენჯერმე 15 წუთით დააგვიანო, რომ მკაცრი დაკვირვების ობიექტი იქნები.

10. შეაქე ბავშვები შრომისთვის და არა ნიჭისთვის. კვლევები აჩვენებს, რომ ბავშვები, რომლებიც ბევრს შრომობენ, დროთა განმავლობაში ნიჭიერებს უსწრებენ.

11. სადაც შესაძლებელია, ბოდიში მადლობით ჩაანაცვლე. მაგალითად, ბოდიში დაგვიანებისთვის კი არა, მადლობა მოთმინებისთვის.

12. თუ ვინმე უკვე მოყოლილ ისტორიას თავიდან გიყვება, არ უთხრა "ეს უკვე მომიყევი", თქვი "ეს ამბავი მახსოვს". ეს ხაზს უსვამს ფაქტს, რომ ისტორია საკმარისად საინტერესო იყო იმისთვის, რომ დასამახსოვრებლად ჩაგეთვალა.

13. ნაცვლად ტყუილში მეორე ადამიანის დადანაშაულებისა, იკითხე "იტყუები?". ამ კითხვაზე მატყუარები ძალიან იბნევიან.

14. გამოიყენე 5 წამის წესი, სანამ ვინმეს გარეგნობასთან დაკავშირებით რაიმე არასასიამოვნოს ეტყოდე. მხოლოდ ის ნაკლი ახსენე, რომლის გამოსწორებაც 5 წამში შეიძლება. მაგალითად, სოუსი სახეზე ან საჭმლის ნარჩენი კბილებს შორის.

15. როცა სამართალდამცავთან გაქვს შეხება, უპასუხე კითხვებს რაც შეიძლება მინიმალური რაოდენობის სიტყვით. დამატებითი ინფორმაციის გაცემის გარეშე. თუ ისეთ სიტუაციაში ხარ, სადაც შეიძლება დაგაპატიმრონ (მაგალითად, წვეულებაზე ნარკოტიკებით), უბრალოდ დაყარე, თუ რაიმე გაქვს და სიარული განაგრძე. იმ შემთხვევაშიც კი, თუ ფანარს მოგანათებენ ან დაგიძახებენ, სიარული არ შეწყვიტო. ყოველთვის შეგიძლია თქვა, რომ ხმა ვერ გაიგონე. როგორც წესი, პოლიციელები ისეთ სიტუაციაში, სადაც ბევრი ადამიანია, არავის მისდევენ შენობის გარეთ.

არ უპასუხო პოლიციელს კითხვაზე კითხვით. მაგალითად:

- შეიძლება თქვენი მანქანა გავჩხრიკოთ?

- უფლება გაქვთ, რომ გაჩხრიკოთ?

- რაიმეს მალავთ?

უბრალოდ თქვით "არა". თუ უფლება აქვთ, ისედაც გაჩხრეკენ, შენი ნებართვის გარეშე.

გარდა ამისა, არასდროს ენდო პოლიციელს, რომელიც გარწმუნებს, რომ შენ მხარესაა.

16. "შეგიძლია, დამეხმარო?" დახმარების შანსს ბევრად უფრო ზრდის, ვიდრე "შენთან ერთი თხოვნა მაქვს".

17. დასვენების დღეებში მაღვიძარა მაინც დააყენე. ორი რამ შეიძლება მოხდეს: ან დროზე ადრე გამოფხიზლდები და მეტი თავისუფალი დრო გექნება, ან მაღვიძარას გამორთავ და ძალიან გაგიხარდება, რომ სასწრაფოდ ასადგომი არ ხარ.

18. თუ ადამიანებს ეტყვი, რომ რაიმე არასდროს გაგისინჯავს, აუცილებლად შემოგთავაზებენ.

19. თვითირონია მნიშვნელოვანი იარაღია. ადამიანები დამცინავ კომენტარებს მხოლოდ იმას პატიობენ, ვინც საკუთარ თავსაც დასცინის.

20. თუ შეხვედრაზე აგვიანებ, იყიდე დონატები ან კრუასანები. შედეგად, დაგვიანებული ადამიანი კი არ იქნები, არამედ ადამიანი, რომელმაც კრუასანები მოიტანა.