სახელმწიფო უწყებების წარმომადგენლები ადასტურებენ, რომ საქართველოში ტექდათვალიერების პროცესი ხარვეზებით მიმდინარეობს. შემოწმების გასავლელად მძღოლები რიგ შემთხვევებში ნაწილებს თხოულობენ, რაც იმას ნიშნავს, რომ ტექდათვალიერების გავლის შემდეგაც ქალაქში გაუმართავი ტრანსპორტი დადის. ამის შესახებ მათ დღეს, 27 თებერვალს გარემოს დაცვისა და ბუნებრივი რესურსების კომიტეტის თემატური მოკვლევის ჯგუფში ჰაერის დაბინძურების საკითხებზე ისაუბრეს.

ეკონომიკის სამინისტროს ტრანსპორტის დეპარტამენტის უფროსის მოადგილის, ერეკლე კეჟერაშვილის თქმით, ამ პრობლემის აღმოსაფხვრელად მთავრობამ პერიოდული ტექნიკური ინსპექტირების ვალდებულება დადგინდა და შემდგომი ინსპექტირების ვადები რეგლამენტით გაიწერა. მისი განმარტებით, ცვლილება შევიდა ტექნიკურ რეგლამენტშიც. თუ ამ დრომდე მძღოლს პირველ ინსპექტირებაზე რომელიმე ნაწილის გაუმართაობის გამო მანქანას დაუხარვეზებდნენ, განმეორებით ვიზიტზე მხოლოდ ხარვეზის აღმოფხვრას ამოწმებდნენ. ახლა ინსპექტორი ვალდებულია მანქანა ვიზუალურადაც შეამოწმოს.

სახმელეთო ტრანსპორტის სააგენტოს უსაფრთხოების სამსახურის უფროსის, შალვა ურიადმყოფილის თქმით, ხარვეზის აღმოსაფხვრელად მიყვანილ ავტომობილებს რიგ შემთხვევებში მანამდე შემოწწმებული ნაწილები გაუმართავი ხვდებოდათ. ახლა ინსპექტორებს საქარე მინების, მაშუქების, გამონაბოლქვისა და სხვა დეტალების შემოწმება მოუწევთ.

შალვა ურიადმყოფილის თქმით, ამ დროს არ მოწმდება მანქანის სავალი ნაწილი. ამის მიზეზად ის დაასახელა, რომ განმეორებითი ინსპექტირება არის უფასო და ამ შემთხვევაში სრულ შემოწმებას ვერ ჩაატარბენ, რადგან ინსპექტირებაში კერძო სექტორია ჩართული და მათ ექმნებათ პრობლემები. მისივე თქმით, სრულ შემოწმებას აფერხებს დროის ფაქტორიც, რადგან მას დაახლოებით 15-30 წუთი სჭირდება.

სამუშაო ჯგუფის წევრმა, გიორგი ხატიძემ იკითხა არის თუ არა შემთხვევები, რომ ხელახალი ინსპექტირების დროს შემოწმებაზე მივიდეს მანქანა, რომელსაც ვიზუალური მხარე მოწესრიგებული აქვს, მაგრამ გაუმართავია სავალი ნაწილი. უწყებების წარმომადგენლებმა მსგავსი საფრთხის არსებობა დაადასტურეს.

ერეკლე კეჟერაშვილმა განაცხადა, რომ ტექინსპექტირების მიზანი პრევენციაა. როგორც მან აღნიშნა, არამხოლოდ ინსპექტირების გავლის დროს შეიძლება მივიდეს გაუმართავი ავტომობილი. მისივე თქმით, შესაძლოა, ტექდათვალიერება გავლილი ავტომობილი რამდენიმე თვეში დაზიანდეს, მაგრამ მძღოლს არ აქვს ვალდებულება მაშინვე გაიაროს ინსპექტირება, რადგან შემოწმების პერიოდულობა ნორმატიული აქტითაა გაწერილი. მისივე თქმით, ამ შემთხვევაში მნიშვნელოვანია საზოგადოებრივი თვითშეგნება და ყველაფერს ინსპექტირების გავლა ვერ მოაგვარებს.

ფოტო: Shutterstock/Alexander Ishchenko

კიდევ ერთ პრობლემაზე ისაუბრა აკრედიტაციის ცენტრის გენერალური დირექტორის მოვალეობის შემსრულებელმა, მალხაზ ხარებავამ. მისი თქმით, 2018 წლის გამონაბოლქვზე დახარვეზდა 13 897 ავტოსატრანსპორტო საშუალება, განმეორებით შემოწმებაზე მისვლის შემდეგ კი გზაზე გადაადგილება აეკრძალა 2 400-ზე მეტს. მისივე თქმით, ამ ეტაპზე არ არის ცნობილი ეს ავტოსატრანსპორტო საშუალებები შეჩერებულია თუ განაგრძობენ მოძრაობას მიუხედავად იმისა, რომ ტექინსპექტირება ვერ გაიარეს.

ხარაბავამ განმარტა ისიც, რომ ამ მანქანების შესახებ ინოფრმაციას აწვდიან ეკონომიკისა და შინაგან საქმეთა სამინისტროს. როგორც On.ge-ს შინაგან საქმეთა სამინისტროში განუმარტეს 14 იანვრიდან 31 იანვრის ჩათვლით, 18 დღეში ტექდათვალიერების არგავლის გამო 13 982 ჯარიმა გამოიწერა.

შეხვედრაზე დაისვა კითხვა, არის თუ არა საკმარისი პრევენციის ეს გზები იმისთვის, რომ ქუჩაში გაუმართავი ავტომობილები არ აღმოჩნდნენ და რისი გაკეთება შეიძლება დამატებით.

შალვა ურიდამყოფელმა განაცხადა, რომ არსებული ხარვეზების აღმოსაფხვრელად გამოსავალი არის გზებზე გადასატანი მობილური ცენტრის დადგმა. მისი თქმით, თუ აღმსრულებელს ეს მოწყობილობა იქნება მძღოლი აღარ გაივლის მოტყუებით ტექისნეპქტირებას, რადგან არასდროს ეცოდინება როდის გააჩერებენ და შეამოწმებენ ხელახლა.

ამავე თემაზე: