პაატა ბურჭულაძის საარჩევნო ბლოკი ითანამშრომლებს ყველა პარტიასთან, რომელიც დათანხმდება იმ რეფორმების გატარებას, რომელიც სახელმწიფო ხალხისთვის პროგრამაშია გაწერილი. ამის შესახებ დღეს გამართულ ბრიფინგზე გირჩის თავმჯდომარემ ზურა ჯაფარიძემ განაცხადა:

"არანაირი თანამშრომლობა არც ერთ პოლიტიკურ პარტიასთან დაგეგმილი არ არის. ჩვენ ვაპირებთ შევიდეთ პარლამენტში ისეთი ფრაქციით, რომლის გარეშეც გაუჭირდება ნებისმიერ პროდასავლურ ძალას მთავრობის ფორმირება. ამ შემთხვევაში ჩვენთვის პრინციპული რაც იქნება, იქნება ის რეფორმების ჩამონათვალი, რომელიც ჩვენ გვაქვს გაწერილი ჩვენს პროგრამაში. თუ რომელიმე პოლიტიკური ძალა დათანხმდება ამ რეფორმების გატარებას, ამ შემთხვევაში ჩვენ, ცხადია, ვითანამშრომლებთ. ასე თანამშრომლობდა გირჩი დღევანდელ პარლამენტში. არის კანონპროექტები მხარი დაგვიჭერია ქართულ ოცნებასთან ერთად ან/და ნაციონალურ მოძრაობასთან ერთად".

ჯაფარიძის თქმით, საარჩევნო სიის პირველ ათეულში იმიტომ არ მოხვდა, რომ მისი ინტერესი ვაკის ოლქის მოგება და ქართულ პოლიტიკაში ახალი სახეების მოხვედრაა:

"12 ნომერი ვარ იმიტომ, რომ, როდესაც თავის დროზე ვაფუძნებდი გირჩს, ჩემი გაცხადებული მიზანი იყო, რომ კარი გამეხსნა ახალი ადამიანებისთვის ქართულ პოლიტიკაში. გირჩი რომ გასულიყო არჩევნებზე ცალკე, სავარაუდოდ, მე ვიქნებოდი 1-ლი ნომერი, რადგან გირჩი გადის არჩევნებზე ბლოკში ჩემთვის პრინციპულად მნიშვნელოვანი იყო გირჩის წევრები მოხვედრილიყვნენ სიაში, ზემოთ, გამსვლელ ადგილებზე. მე ვაპირებ კენჭი ვიყარო მაჟორიტარად ვაკეში, ვაპირებ, რომ მოვიგო ეს არჩევნები. მე მაქვს უკვე გამოცდილება პარტიული სიით პარლამენტში გასვლის, თუმცა ამჯერად ჩემი ინტერესია, რომ მოვიპოვო კონკრეტული ოლქის ამომრჩევლების მხარდაჭერა. სანამ მე ვარ გირჩის თავმჯდომარე და ერთ-ერთი დამფუძნებელი, გირჩში არ იქნებიან ადამიანები, რომლებიც ყველგან თავით ეთხრებიან პირველები."