ჭიდაობის ფედერაციაში პრეზიდიუმის სხდომის დასრულების შემდეგ მოჭიდავე ზურაბ დათუნაშვილმა ფეისბუქის ოფიციალურ გვერდზე განცხადება გაავრცელა.

სპორტსმენი წერს, რომ პრეზიდიუმი სხდომას შედეგი არ მოჰყოლია, რადგან სხდომაზე არც გეგა გეგეშიძის გადადგომის საკითხი და არც 11 იანვარს მომხდარი შემთხვევა არ განხილულა.

"ორი საათის განმავლობაში მიდიოდა ჩემი დარწმუნება, რომ შევრიგებულიყავი ფედერაციის პრეზიდენტთან. ბოდიში თავად გეგა გეგეშიძემაც მოიხადა. მე აღვნიშნე, რომ მის ბოდიშს არ ვიღებ და მან ჩადენილი საქციელის გამო თანამდებობის დატოვებით უნდა აგოს პასუხი. მისი სინანული მთლიანად ეფუძნება სკამის შენარჩუნების მცდელობას, ასე რომ არ იყოს გადადგებოდა და ისე მოიბოდიშებდა, რასაც მეც, ბუნებრივია, მივიღებდი", — აცხადებს ზურაბ დათუნაშვილი.

მან კიდევ ერთხელ აღნიშნა, რომ გეგა გეგეშიძესთან მუშაობა არ შეუძლია და ქვეყნიდან წავა, მიუხედავად იმისა, მიეცემა თუ არა დისკვალიფიკაცია.

"ანუ ფედერაციის პრეზიდიუმის წევრები მზად არიან იმსჯელონ თუნდაც ჩემს ქვეყნიდან წასვლაზე, ოღონდ არავითარ შემთხვევაში ვერსიის დონეზეც არ განიხილონ გეგასთვის უფლებამოსილების შეჩერების საკითხი", —წერს სპორტსმენი.

მისი აზრით, პრეზიდიუმის წევრები ცდილობენ სიტუაცია ისე წარმოაჩინონ, თითქოს ქვეყნიდან წასვლა სურს.

"რეალურად კი ყოველთვის ხაზგასმით აღვნიშნავ, რომ საქართველოს სახელით ასპარეზობას იმ შემთხვევაში არ გავაგრძელებ, თუ გეგეშიძე არ გადადგება, ხოლო თუ ის და მისი გარემოცვა ჩამოსცილდება ფედერაციას მე სადმე წასვლას აზრადაც არ გავივლებ", — ვკითხულობთ გავრცელებულ განცხადებაში.

დათუნაშვილის თქმით, მას მხოლოდ ერთ გზას უტოვებენ — წავიდეს ქვეყნიდან.

"თუ საქართველოდან წავალ, შეუძლიათ ორწლიანი დისკვალიფიკაცია მომცენ და ამ ხნის განმავლობაში ჭიდაობას ვერც ერთი ქვეყნის სახელით ვერ შევძლებ, თუმცა თუკი მეტ გზას არ დამიტოვებენ, ჩემი სიმართლისთვის ესეც მიღირს და ამისთვისაც მზად ვარ", — ნათქვამია განცხადებაში.

23 თებერვალს ჭიდაობის ფედერაციაში პრეზიდიუმის სხდომა გაიმართა, სადაც 11 თებერვალს სპორტის სასახლეში მომხდარ ინციდენტზე უნდა ემსჯელათ. სხდომის დასრულების შემდეგ, ზურაბ დათუნაშვილმა თქვა, რომ გეგეშიძესთან შერიგებას სთხოვდნენ, რასაც არ აპირებს და ქვეყნიდან წასვლის უფლებას ითხოვს. ჭიდაობის ფედერაციის ვიცე-პრეზიდენტის განმარტებით, დათუნაშვილს ქვეყნიდან წასვლა უნდა, რაც მხოლოდ ფედერაციის გადასაწყვეტი არაა. პრეზიდიუმის პარალელურად ფედერაციასთან აქცია გაიმართა.

რუსთავი 2-ის მიერ გავრცელებულ კადრებში ჩანს, რომ მოჭიდავე ზურაბ დათუნაშვილს მუშტი სახეში საქართველოს ჭიდაობის ეროვნული ფედერაციის პრეზიდენტმა თამაზ (გეგა) გეგეშიძემ ჩაარტყა. ვიდეომასალის მიხედვით, ფედერაციის პრეზიდენტში ხელში რაღაც ნივთი უჭირავს, რომელსაც სპორტსმენის მიმართულებით იქნევს და შემდეგ მუშტს არტყამს. ამ ფაქტის შემდეგ დათუნაშვილს სახიდან სისხლი მოსდის.

ჭიდაობის ფედერაციის პრეზიდენტი თამაზ (გეგა) გეგეშიძე, სპორტის სასახლეში, სპორტსმენ ზურაბ დათუნაშვილის მიმართ განხორციელებული ძალადობის ბრალდებით 22 იანვარს, საღამოს დააკავეს. გამოძიების ვერსიით, 11 იანვარს, სპორტის სასახლეში მომხდარი დაპირისპირებისას, თამაზ გეგეშიძემ ფიზიკური შეურაცხყოფა მიაყენა სპორტსმენ ზურაბ დათუნაშვილს. მოჭიდავეების ნაწილი ფედერაციის პრეზიდენტის, გეგა გეგეშიძის დაკავებას აპროტესტებს. ისინი გეგეშიძის გათავისუფლებას ითხოვენ და ამბობენ, რომ სპორტის სასახლეში მომხდარი დაპირისპირება ინციდენტი იყო, რომელიც ფედერაციაშივე უნდა დასრულებულიყო.

გეგეშიძის აღკვეთის ღონისძიებაზე სასამართლომ 24 იანვარს იმსჯელა. მან ციხე 5 000 ლარის გადახდის შემდეგ დატოვა.

ამავე თემაზე: