პარტია ქართული ოცნება განცხადებას ავრცელებს, რომ ამიერიდან ბიძინა ივანიშვილი დეპუტატთა მცირე ჯგუფებთან "თემატურ შეხვედრებს" გამართავს. ამის მიზეზად დასახელებულია ის, რომ უმრავლესობის ფორმატში ვერ ხდება საკითხების დეტალური განხილვა. მომდევნო შეხვედრა დეპუტატთა სხვა ჯგუფთან 25 თებერვალს არის დაგეგმილი.

განცხადების თანახმად, შეხვედრების მიზანია, ინდივიდუალურად ყველას მიეცეს შესაძლებლობა, გამოხატოს და განიხილოს საკუთარი მოსაზრებები სხვადასხვა საკითხებზე.

პარტიის განცხადებით, დღეს, 22 თებერვალს პირველად ბიძინა ივანიშვილი იმ ჯგუფს შეხვდა, რომელმაც განსხვავებული პოზიცია გამოხატა "საერთო სასამართლოების შესახებ“ კანონპროექტთან დაკავშირებით. ეკა ბესელიას და კიდე 8 დეპუტატის კანონპროექტს, მოსამართლეთა უვადოდ დანიშვნის საკითხზე, მხარი დაუჭირა დეპუტატმა ნუკრი ქანთარიამ. ბიძინა ივანიშვილთან შეხვედრიდან გამოსულმა ქანთარიამ ჟურნალისტებს უთხრა, რომ "ქართული ოცნებიდან არავის არავინ არ გაურიცხავს". მისი თქმით, შეხვედრაზე რომელიმე დეპუტატის გარიცხვის საკითხი არ განუხილავთ.

"უამრავი საკითხი განვიხილეთ. სასამართლოზეც იყო საუბარი, სხვა საკითხებზეც იყო საუბარი, განათლებაზე, კულტურაზე და საერთოდ, უმრავლესობის მომავალზე", — უთხრა შეხვედრის შემდეგ ქანთარიამ ჟურნალისტებს.