სახალხო დამცველი N6 დაწესებულებაში მყოფი მსჯავრდებულის გ.ბ.-ს მიმართ განხორციელებული სავარაუდო არასათანადო მოპყრობის ფაქტზე, გამოძიების დაწყების წინადადებით მთავარ პროკურორს მიმართავს.

ომბუდსმენი განმარტავს, რომ მსჯავრდებულის მიმართ სავარაუდო არასათანადო მოპყრობის ფაქტზე გამოძიება დაუყოვნებლივ უნდა დაიწყოს და აწარმოოს საქართველოს პროკურატურამ:

"გამოძიება უნდა წარიმართოს ეფექტიანად: ჩატარდეს ყველა საჭირო და აუცილებელი საგამოძიებო მოქმედება, მათ შორის, დროულად ჩატარდეს სასამართლო-სამედიცინო ექსპერტიზა მსჯავრდებულის სხეულზე არსებული დაზიანებების ხარისხის, ხასიათის, ხანდაზმულობის, წარმოშობისა და განვითარების მექანიზმის დასადგენად; დროულად მოხდეს მითითებული ფაქტის ამსახველი ვიდეო-ჩანაწერების ამოღება საგამოძიებო ორგანოს მიერ".

სახალხო დამცველის ინფორმაციით, 2016 წლის 3 სექტემბერს, დაწესებულებაში მსჯავრდებულების სატელეფონო საუბრებისთვის განკუთვნილ სპეციალურ ოთახში სატელეფონო საუბრის დასრულების შემდეგ, დაწესებულების რამდენიმე თანამშრომელმა მას სიტყვიერი და ფიზიკური შეურაცხყოფა მიაყენა:

"თანამშრომლებმა პლასტმასის ხელკეტი დაარტყეს მარცხენა ხელზე, შემდეგ კი 2–3 წუთის განმავლობაში ფეხებს ურტყამდნენ. გ.ბ.–ს თქმით, მას დაწესებულების თანამშრომლები მოცემულ შემთხვევამდე ემუქრებოდნენ სასჯელის დამატებით, თუ არ შეწყვეტდა საჩივრების წერას, მათ შორის, სახალხო დამცველთან განცხადებების გაგზავნას, ხოლო დაწესებულების უსაფრთხოების უფროსმა და სამართლებრივი რეჟიმის უფროსმა მუქარის ტონით უთხრეს, რომ შეეწყვიტა საჩივრების წერა".

სახალხო დამცველი აღნიშნავს, რომ მსჯავრდებულ გ.ბ.-ს სხეულზე აღენიშნებოდა მრავლობითი დაზიანებები.

გარდა ამისა, ომბუდსმენი აცხადებს რომ სახალხო დამცველის რწმუნებულების მიერ პენიტენციური დეპარტამენტის ჟურნალების დათვალიერების შედეგად გაირკვა, რომ დაწესებულების მიერ მსჯავრდებულის დაზიანებები აღწერილი არ იყო და დაზიანებების შესახებ არც საგამოძიებო ორგანოში იყო გაგზავნილი შეტყობინება:

"დაწესებულების ექიმმა მსჯავრდებული დაწესებულების საგამოძიებო ოთახში დაათვალიერა და დაზიანებები აღწერა მხოლოდ 2016 წლის 7 სექტემბერს, საქართველოს სახალხო დამცველის რწმუნებულების მოთხოვნის შემდეგ".