დევიდ ლინჩის 1986 წლის კლასიკიდან Blue Velvet ამოჭრილი 51-წუთიანი მონაკვეთი მაისში გავრცელდება. მასში შევა ფილმის ის ნაწილი, რომელიც თავდაპირველ ვერსიაში ამოჭრეს და დაკარგული იყო.

ლინჩმა 2011 წელს KCRW-სთან ინტერვიუში თქვა, რომ ფილმიდან დაკარგული სცენები აღმოაჩინეს:

"საოცარია, რომ იმას უყურებ, რაც სამუდამოდ დაკარგული გეგონა".

Criterion-ის კოლექციაში შესული ფილმის Blu-Ray ვერსია 28 მაისს გამოვა. ამოჭრილი სცენები მასში ბონუსის სახით შევა. ახალ ვერსიაში იქნება კადრს მიღმა გადაღებული 70-წუთიანი დოკუმენტური მასალაც. როგორც ცნობილია, ლინჩმა ფილმის დაკარგული ნაწილი სიეტლში მიაგნო.

ფილმში ლურჯი ხავერდი კაილ მაკლაჰენი, იზაბელა როზელინი, ლორა დერნი და დენის ჰუპერი მონაწილეობენ. მაკლაჰენი კოლეჯის სტუდენტია, რომელიც მინდორში მოჭრილ ყურს პოულობს. აღმოჩენას ის იდუმალ მომღერალთან მიჰყავს, რომლის როლსაც იზაბელა როზელინი ასრულებს.