5 ივნისიდან სამყაროს ახალი განსახილველი თემა მიეცემა. სოციალურ ქსელებსა თუ მედიას მხევლის წიგნი კიდევ ერთხელ, ამჯერად მესამე სეზონით აალაპარაკებს და კიდევ ერთხელ დავიწყებთ იმის რკვევას, რა ბედი ეწევათ ჯუნს, სხვა მხევლებსა თუ გილიედში მცხოვრებ სხვა ადამიანებს. გავიგებთ ბოლოს და ბოლოს, გაიღვიძებს თუ არა ამერიკა და რას მოიმოქმედებს სერენა, რომელიც თუ ბოლო სეზონს გავითვალისწინებეთ, ნელ-ნელა თავად ხდება მეამბოხე.

სერიალისადმი მოლოდინი კიდევ უფრო გაამძაფრა სერიალის ახალი სეზონის პირველმა ოფიციალურმა ტიზერმა, სადაც ცეცხლში გახვეული ქალაქი, შეშინებული მართები და განრისხებული კომანდირი უოთერფორდი ჩანდნენ.

თუმცა, ცოტა ხნის წინ ეს მოლოდინი გადასაღები მოედნიდან გავრცელებულმა ახალმა ფოტოებმა კიდევ უფრო გაამძაფრა. კადრებში ჩანს, რომ Hulu-ს სერიალის რამდენიმე სცენა პირდაპირ ლინკოლნის მემორიალთან არის გადაღებული.