სახელმწიფო დეპარტამენტის ოფიციალურმა წარმომადგენელმა ჰიზერ ნოიერტმა გაეროში აშშ-ს მუდმივ წარმომადგენლობაზე უარი თქვა. ამის შესახებ სახელმწიფო დეპარტამენტის განცხადებაშია ნათქვამი. როგორც ნოიერტი ამბობს, აღნიშნული გადაწყვეტილება ოჯახის გამო მიიღო:

"ბოლო ორი თვე ჩემი ოჯახისთვის ძალიან რთული იყო, ამიტომაც ოჯახის ინტერესების სასარგებლოდ ამ თანამდებობაზე უარი ვთქვი".

The Washington Post სამ წყაროზე დაყრდნობით წერს, რომ ნოიერტის უარი შესაძლოა, უკავშირდებოდეს მისი შვილების ძიძას, რომელიც იამაიკის მოქალაქეა და აშშ-ში არალეგალურად იმყოფება.

კიდევ ერთი ამერიკული გამოცემა CNN წერს, რომ ძიძა ქვეყანაში კანონიერად არის, თუმცა სამუშაო ვიზა არ აქვს. გარდა ამისა, გამოცემა წერს, რომ ძიძა ხელფასს ნაღდი ანგარიშსწორებით იღებდა და შესაბამის გადასახადს არ იხდიდა.

პრეზიდენტმა, დონალდ ტრამპმა ჰიზერ ნოიერტის კანდიდატურა 2018 წლის დეკემბერში წამოაყენა. ნოიერტს ამ თანამდებობაზე ნიკი ჰეილი უნდა შეეცვალა, რომელმაც პოსტი რამდენიმე თვის წინ დატოვა.

48 წლის ჰიზერ ნოიერტი სახელმწიფო დეპარტამენტში პრესსამსახურის ხელმძღვანელად 2017 წლის აპრილიდან მუშაობდა, იმ დროს სახელმწიფო მდივანი ჯერ კიდევ რექს ტილერსონი იყო. მას შემდეგ რაც ტილერსონი მაიკ პომპეომ შეცვალა, ნოიერტი ხშირად დაჰყვება მას მივლინებებში და მალევე საზოგადოებასთან ურთიერთობის საკითხებში პომპეოს მოადგილედ დაინიშნა.

სახელმწიფო სამსახურამდე ნოიერტი მუშაობდა ტელეკომპანია Fox-ში და გადაცემა Fox and friends მიჰყავდა. შემდგომში ტრამპმა აღიარა, რომ გადაცემას ხშირად უყურებდა და ტელეწამყვანს აქებდა.