"ევროკავშირსა და ნატო-ში გაწევრების არჩევანი არ არის მხოლოდ პოლიტიკური. ეს ჩემი ერის ცივილიზაციური და ღირებულებებით გაჯერებული არჩევანია", — ამ სიტყვებით მიმართა საქართველოს პრემიერ-მინისტრმა მამუკა ბახტაძემ ნატო-ს გაფართოების საკითხებისადმი მიძღვნილ მრგვალ მაგიდაზე შეკრებილ სტუმრებს მიუნხენში. ღინისძება მიუნხენის უსაფრთხოების 55-ე კონფერენციის ფარგლებში გაიმართა.

პრემიერ-მინისტრმა აღნიშნა, რომ მოკავშირეების შეფასებით, საქართველოს ყველა პრაქტიკული ინსტრუმენტი გააჩნია საბოლოო გაწევრებისთვის.

"ნატოში გაწევრება საქართველოსთვის კრიტიკული მნიშვნელობისაა, თუმცა თავად ნატოს ინტერესებშია, ქვეყანა მიუახლოოს ალიანსში გაწევრების ეტაპს. ჩვენი მოსაზრებით, დროა, ნაბიჯები გადაიდგას ამ მიმართულებით, რადგან ამის "შესაძლებლობათა ფანჯარა" ღიაა. ყოყმანი არ დაგვეხმარება გამოწვევებთან გამკლავებაში. ნატოს გაფართოება ევროპაში კიდევ უფრო მეტად გაზრდილი მშვიდობისა და უსაფრთხოებისთვის ყველაზე გამართლებული ვარიანტია", — განაცხადა მამუკა ბახტაძემ

პრემიერმა შეკრებილ აუდიტორიას განუცხადა, რომ ნატოში გაწევრება საქართველოს საგარეო პოლიტიკის უპირველეს პრიორიტეტად რჩება:

"გვახარებს ის ფაქტი, რომ ღია კარის პოლიტიკა კვლავ მუშაობს და ხელშესახები შედეგები მოაქვს იმ ერებისთვის, რომლებსაც ალიანსში გაწევრება სურთ და ამისთვის არანაირ რესურსს არ ზოგავენ".

პრემიერმა ჩრდილოეთ მაკედონიის რესპუბლიკას მიულოცა ისტორიული მიღწევა, რომელიც ერთი კვირის წინ გაწევრების პროტოკოლის ხელმოწერით აღინიშნა და ასევე მიესალმა სხვა ერებისთვის გაწევრების მკაფიო პერსპექტივის გაჩენას:

"ასპირანტი ქვეყნის - საქართველოსთვის წამახალისებელია დასავლეთ ბალკანეთის ასპირანტი ქვეყნების წარმატება და იმედს ვიტოვებთ, რომ ეს პროცესი მოახდენს ნატოში ჩვენი ინტეგრაციის სტიმულირებასაც".