პრეზიდენტის მიერ წარდგენილი უზენაესი სასამართლოს მოსამართლეობის 3 კანდიდატის დასამტკიცებლად დღეს პარლამენტი ვერ შეიკრიბა. პარლამენტის პლენარულ სხდომაზე, რომელზეც კანდიდატების კენჭისყრა იყო დაგეგმილი კვორუმის უქონლობის გამო ვერ გაიხსნა. პრეზიდენტის საპარლამენტო მდივანმა ანა დოლიძემ, რომელიც მოსამართლეობის კანდიდატებთან ერთად ქუთაისში იმყოფებოდა, განაცხადა რომ სხდომის ჩაშლა მეტყველებს დეპუტატების დამოკიდებულებაზე სასამართლო ხელისუფლების მიმართ:

"ის, რომ უკვე მეექვსედ ჩაიშალა უზენაესი სასამართლოს მოსამართლეების დამტკიცება პარლამენტში, მეტყველებს პარლამენტში წარმოდგენილი პოლიტიკური ძალების - უმცირესობის და უმრავლესობის დამოკიდებულებაზე სასამართლო ხელისუფლების მიმართ, ასევე, საკუთარი მოვალეობებისა და საქართველოს იმ მოქალაქეების მიმართ, რომლებიც სამართლიანი მართმსაჯულების განხორციელებას ელიან".

საქართველოს პრეზიდენტმა პარლამენტს დასამტკიცებლად ნონა თოდუას, თამარ ლალიაშვილის და ლევან ბოძაშვილის კანდიდატურები შესთავაზა.