საქართველოს სახალხო დამცველმა, ნინო ლომჯარიამ სოციალურ სისტემაში არსებულ გამოწვევებთან დაკავშირებით მთავრობის წარმომადგენლებსა და სახელმწიფო სტრუქტურებს მიმართა. ლომჯარია მოუწოდებს მათ გადაუდებლად იმოქმედონ აღნიშნული პროფესიის გასაძლიერებლად, რადგან, მისი თქმით, ქვეყანაში არსებული არაერთი გამოწვევა სწორედ სოციალური მუშაკის საქმიანობის ეფექტურობაზეა დამოკიდებული.

ლომჯარიას განცახდებით, სოციალურ მუშაკები წლების განმაბლობაში არასათანადო პირობებში მინიმალური ფინანსური და ადამიანური რესურსებით მუშაობენ. მისი თქმით, შემაშფოთებელია, რომ აქამდე ვერ გადაიჭრა მათი ტრანსპორტირების, სამუშაო ინფრასტრუქტურისა და სხვა სახის პრობლემები.

ომბუდმსენი აცხადებს, რომ სახელმწიფომ სრულად უნდა გაიაზროს სოციალური მუშაკის როლი ქვეყანაში ეფექტური სოციალური სისტემის შექმნის პროცესში და მათ მისცეს შესაძლებლობა, სათანადო სამუშაო პირობებში განახორციელონ მათზე დაკისრებული ვალდებულებები და ისარგებლონ დაცვისა და მხარდაჭერის მაღალი სტანდარტით.

სახალხო დამცველი მზადყოფნას გამოთქვამს, შეხვდეს პროცესში ჩართულ სოციალურ მუშაკებს სისტემაში არსებული პრობლემების განხილვის მიზნით.

8 თებერვალს სოციალური მომსახურების სააგენტოს თანამშრომლებმა აქცია გამართეს და ჯანდაცვის სამინისტროს წერილით მიმართეს. მათ დაუყოვნებლივი რეფორმების გატარება მოითხოვეს იმისთვის, რომ ეფექტურად შეძლონ საქმიანობის განხორციელება. მათი თქმით, უწყებას აქამდეც მიმართეს, თუმცა რეაგირება არ ყოფილა.

სოციალური მუშაკები აცხადებენ, რომ მათ არ აქვთ ნორმალური სამუშაო სივრცე, სადაც იმ ადამიანებს მიიღებენ, ვისაც დახმარებას უწევენ. მათივე თქმით, სერვისების არარსებობა ართულებს მოწყვლად ჯგუფებთან მუშაობის პროცესს. გარდა ამისა, პროტესტის მონაწილეები ანაზღაურებისა და კადრების დამატებას ითხოვენ.