საქართველოს პარლამენტში რუსული პროპაგანდისა და დეზინფორმაციის შესახებ თემატური მოკვლევის სამუშაო ჯგუფი შეიქმნა. ჯგუფი საქართველოს პარლამენტის წევრებისგან და სხვა დაინტერესებული პირებისგან დაკომპლექტდება.

დეპუტატებმა სამუშაო ჯგუფთან დაკავშირებით საგარეო ურთიერთობათა კომიტეტის სხდომაზე პრინციპული საკითხები შეათანხმეს, მოგვიანებით დაზუსტდება, რა ფორმით დაკომპლექტდება სამუშაო ჯგუფი.

ცნობილია, რომ ამ ჯგუფს უხელმძღვანელებს საგარეო ურთიერთობათა კომიტეტის თავმჯდომარე ნინო გოგუაძე. მოკვლევის ჯგუფი ძირითადად დახურულ ფორმატში იმუშავებ. მათი თქმით, ამის მიზეზი ის არის, რომ სამუშაო პროცესი მაქსიმალურად დაიცალოს პოლიტიკური განწყობებისგან.

დეზინფორმაციისა და პროპაგანდის საკითხზე თემატური მოკვლევის სამუშაო ჯგუფის შექმნას ეთანხმება საპარლამენტო ოპოზიციის ნაწილი. ევროპულმა საქართველომ და ნაციონალურმა მოძრაობამ კომიტეტის სხდომაზე დაადასტურეს, რომ მზად არიან ჩაერთონ ჯგუფის მუშაობაში. პატრიოტთა ალიანსს კი ზუსტი პასუხი არ დაუფიქსირებია.

სამუშაო ჯგუფის ხელმძღვანელის თქმით, მათი მიზანი იქნება იკვლიონ საქართველოში რუსულ პროპაგანდასთან დაკავშირებული საკითხები, გაანალიზონ და რეკომენდაციებიც მოამზადონ. ნინო გოგუაძის თქმით, ჯგუფის წევრებს ექნებათ კომუნიკაცია იმ სახელმწიფო უწყებებთან, რომლებიც პასუხისმგებლები არიან სტრატეგიულ კომუნიკაციაზე.

"ჯგუფი თავად განსაზღვრავს თავისი საქმიანობის გრაფიკსა და ფორმატს. ჩვენი მუშაობა შემოიფარგლება ორი თვის ვადით, თუ კომისია ჩათვლის, რომ ეს არ არის საკმარისი, ვადა გაგრძელდება", — განაცხადა ნინო გოგუაძემ საგარეო ურთიერთობათა კომიტეტის სხდომაზე.

ევროპული საქართველოს დეპუტატის, გიგა ბოკერიას თქმით, მოკვლევის ჯგუფმა უნდა განახორციელოს ეფექტური ზედამხედველობა აღმასრულებელ ხელისუფლებაზე. მას იმედი აქვს, რომ კომისია პოლიტიკური ნიშნის გამო ხელს არ დააფარებს კონკრეტულ აღმასრულებელ შტოს თუ პოლიტიკურ ძალას.

"ვეცდებით ავიცილოთ თავიდან პოლიტიკური კონფრონტაცია, მაგრამ მოგიწოდებთ, რომ ამ ნიშნით არ მოხდეს ვინმეზე გადაფარება", — განაცხადა გიგა ბოკერიამ.

ნაციონალური მოძრაობის დეპუტატმა, სალომე სამადაშვილმა განაცხადა, რომ ჯგუფს ვიწრო მანდატი არ უნდა ჰქონდეს და პოლიტიკურ გარემოზეც უნდა შეიძლებოდეს საუბარი.

"თუ ჯგუფი მხოლოდ ტექნიკური საკითხებით შემოიფარგლება, რეალური, ახლის მთქმელი და შედეგის მომცემი არ იქნება", — განაცხადა სამადაშვილმა.

ნინო გოგუაძის თქმით, ამ ჯგუფის საწყისი პოზიცია მუშაობაა. მისი თქმით, ამოცანაა პრობლემის ზოგადი სურათი იყოს დანახული და გაანალიზებული, უნდა გამოიკვეთოს მოწყვლადი ჯგუფებიც. ნინო გოგუაძის თქმით, სამუშაო ჯგუფი თავდაცვისა და უსაფრთხოების საკითხთა კომიტეტის წევრებისგანაც დაკომპლექტდება.

ამავე თემაზე:

• ინფორმაცია, რომელიც წამლავს - რუსული ჰიბრიდული ომის საფრთხეები საქართველოში