შინაგან საქმეთა სამინისტროს ცნობით, პირადი ცხოვრების კადრების გავრცელებისთანავე გამოძიებამ დაადგინა ამტვირთავის ვინაობა და ადგილსამყოფელი. შსს-მ ფარული ჩანაწერების საქმეზე დამატებითი ინფორმაცია მას შემდეგ გაავრცელა, რაც რუსთავი 2-მა შაბათის ცხრიანში ფარული კადრების ატვირთვის ადგილის შესახებ ექსკლუზივი დააანონსა. რუსთავი 2-ის ცნობით, ჩანაწერები სომხეთის ციხიდან აიტვირთა. შსს-ს განცხადება, ამ ინფორმაციას ადასტურებს.

უწყების მიერ გავრცელებულ განცხადებაში ნათქვამია, რომ ამ ეტაპზე დგინდება, რომ ფეისბუქში ერთ-ერთმა მომხმარებელმა საკუთარ გვერდზე ატვირთა სხვისი პირადი ცხოვრების საიდუმლოების ამსახველი კადრები.

შსს-ს ცნობით, ფეისბუქზე სხვა პირის სარეგისტრაციო სახელითა და გვარით, სავარაუდოდ, სარგებლობდა საქართველოს მოქალაქე ინიციალებით დ.ა. მან ფეისბუქის მეშვეობით მიმდინარე წლის იანვარში, ინტერნეტში არაერთხელ გაავრცელა პირადი ცხოვრების ამსახველი კადრები.

"საქართველოს მოქალაქე დ.ი. მეზობელ ქვეყანაში ჩადენილი მძიმე დანაშაულისთვის - მკვლელობისთვის ამჟამად სასჯელს სომხეთის ერთ-ერთ ციხეში იხდის",— ნათქვამია შსს-ს განცხადებაში.

უწყების ცნობით, დ.ა.-მ საქართველოს საზღვარი, მეუღლესთან ერთად 2016 წლის ნოემბერში გადაკვეთა.

განცხადებაში ასევე ნათქვამია, რომ ქართველი და სომეხი სამართალდამცველების თანამშრომლობით, საქართველოს მოქალაქის საკნის ჩხრეკისას, ამოღებულია მისი კუთვნილი samsung-ის მოდელის მობილური ტელეფონი.

შინაგან საქმეთა სამინისტროს ცნობით, აგრძელებენ თანამშრომლობას სომეხ კოლეგებთან, ტარდება შესაბამისი ღონისძიებები, დამატებითი მტკიცებულებების მოპოვების მიზნით.

საზოგადოებას შევახსენებთ, რომ პირადი ცხოვრების ამსახველი კადრების გავრცელების საქმეზე გამოძიების ფარგლებში შინაგან საქმეთა სამინისტრომ 17 პირი დააკავა, მათ შორის პირი, რომელმაც youtube-ზე კადრები ატვირთა.

პირადი ცხოვრების საიდუმლოს ხელყოფის ფაქტზე გრძელდება გამოძიება საქართველოს სსკ-ს 157 პრიმა მუხლის 1-ლი და მე-2 ნაწილებით.

ადამიანების პირადი ცხოვრების ამსახველი მასალის უკანონო მოპოვება, შენახვა და გავრცელება სისხლის სამართლის დანაშაულია. სისხლის სამართლის წესით ისჯება პირადი ცხოვრების ამსახველი მასალის როგორც ნებისმიერი საშუალებით გავრცელება (მათ შორის მობილური აპლიკაციის მეშვეობით გადაგზავნა), ასევე, მისი შენახვა, რაც ისჯება 4-დან 8 წლამდე ვადით თავისუფლების აღკვეთით.

შსს მოუწოდებს საზოგადოებას, შეწყვიტონ მსგავსი ვიდეოჩანაწერის ნებისმიერი სახით გავრცელება. წინააღმდეგ შემთხვევაში, სამართალდამცავი ორგანოების მხრიდან მიღებული იქნება კანონით გათვალისწინებული ზომები.

ინტერნეტში ეკა ბესელიას პირადი ცხოვრების ამსახველი კადრები გავრცელდა. ორივე შემთხვევაში დეპუტატმა საჯაროდ თქვა, რომ ეს ვიდეომასალა მას ფარულად გადაუღეს. ვიდეომასალის გავრცელებას წინ უსწრებდა ბესელიას დაპირისპირება იმ 10-კაციან სიასთან, რომელიც უზენაეს სასამართლოში უვადო მოსამართლეებად უნდა გამწესებულიყო. პირადი ცხოვრების ამსახველი ვიდეოჩანაწერის შენახვისა და გავრცელების ბრალდებით 16 პირი დააკავეს. აღკვეთის ღონისძიებად 2 დაკავებულს პატიმრობა, 7-ს გირაო შეეფარდა.

საქართველოს შინაგან საქმეთა მინისტრის, გიორგი გახარიას თქმით, პირადი ცხოვრების ამსახველი კადრების მასობრივად გავრცელების საქმეზე გამოძიების ფარგლებში მობილიზებულია სამინისტროს და მეგობარი უწყებების რესურსები. მისი თქმით, კიბერდანაშაულის გამოძიების საქმეში შესაძლოა უცხოელი პარტნიორებიც ჩაერთონ. გახარიას განმარტებით, ფარული კადრების გავრცელება იმდენად მძიმე ჩამონათვალია, რომ რანაირი მნიშვნელობა არ აქვს და არ ექნება სხვაობა გავრცელებას, პირველწყაროს და შენახვას შორის.