თბილისის საქალაქო სასამართლომ ფარული ვიდეოჩანაწერების საქმეზე დაკავებული ცხრა პირიდან ორს აღკვეთის ღონისძიების სახით პატიმრობა, შვიდს კი, გირაო შეუფარდა. გუშინ, 1-ელ თებერვალს პირადი ცხოვრების ამსახველი ვიდეოჩანაწერის გავრცელების საქმეზე 16 პირი დააკავეს. შინაგან საქმეთა სამინისტროს ინფორმაციით, კიდევ ერთი პირი დააკავეს, რომელმაც ვიდეოჩანაწერი YouTube-ზე ატვირთა.

აღკვეთის ღონისძიების სახით პატიმრობა შეეფარდა ანტონ ღლონტსა და თემურ ირემაძეს, ხოლო გირაო: მაია ბერიძეს (10 000 ლარი), მარიამ ჩადუნელს (2 000 ლარი), ანი აროშიძეს (2 000 ლარი), თენგიზ ირემაძეს (3 000 ლარი), ნონა ჟორჟაძეს (2 000 ლარი), გიორგი გასვიანს (1 500 ლარი), ირაკლი ქასრაშვილს (3 000 ლარი).

შინაგან საქმეთა სამინისტროს ინფორმაციით, აღნიშნული პირები სოციალური ქსელისა და მობილური ინტერნეტაპლიკაციის მეშვეობით ინახავდნენ და მასობრივად ავრცელებდნენ პირადი ცხოვრების ამსახველ ვიდეოჩანაწერს.