9 თებერვალს, შაბათს, 14 საათზე, უნივერსიტეტის მაღლივი კორპუსის უკან, ქავთარაძის ქუჩისა და მიხეილ შავიშვილის ქუჩის მიმდებარედ აქცია გაიმართება. ამავე მისამართზე მაცხოვრებლები კომპანია m² მიერ, მათი საცხოვრებლის წინ ოთხი კორპუსის მშენებლობას აპროტესტებენ.

აქციის მონაწილეები აცხადებენ, რომ m² არ ახორციელებს ე.წ. ხრუშოვკების ჩანაცვლების პროცესს. მათივე ცნობით, დაგეგმილი ოთხივე კორპუსი ე.წ. ხრუშოვკების მოპირდაპირე მხარეს შენდება, გამწვანებულ სარეკრეაციო ზონაში.

აქციას ადგილობრივი მაცხოვრებლების გარდა უერთდებიან სამოქალაქო მოძრაობები და არასამთავრობო ორგანიზაციები:

  • პარტიზანული მებაღეობა თბილისში Guerrilla gardening Tbilisi;
  • მწვანე ალტერნატივა;
  • Initiative for a Public Space ინიციატივა საჯარო სივრცისათვის;
  • იარე ფეხით Iare Pekhit;
  • ტფილისის ჰამქარი - Tiflis Hamkari;
  • ჩემი ქალაქი მკლავსს;
  • ქალაქგეგმარების რეალური ლაბორატორია;
  • თბილისის ცენტრალური პარკი;
  • ახალგაზრდა მწვანეები;
  • სამოქალაქო მოძრაობა.

"აქ არის გერმანელ ტყვეთა სასაფლაო, რომელსაც აოხრება ელის. გარშემო არსებულ ვიწრო ქუჩებზე მოძრაობა უკვე გადატვირთულია, დამატებითი 350(მინიმუმ) მანქანა გამოიწვევს ამ ტერიტორიის სრულ პარალიზებას, სატრანსპორტო კოლაფსს და ჩვენს ყოფას მუდმივ გამონაბოლქვში", — ნათქვამია აქციის ორგანიზატორების განცხადებაში.

დეველოპერული კომპანია m² თბილისში, ვაჟა-ფშაველას მეექვსე კვარტალში ე.წ. ხრუშოვკებში მაცხოვრებლებს თავიანთი ბინების სანაცვლოდ, ახალაშენებულ კორპუსებში გადასვლას სთავაზობს. ჩანაცვლების პროექტი შავიშვილის ქუჩაზე, თსუ-ს მაღლივ კორპუსსა და ქავთარაძის ქუჩას შორის ტერიტორიაზე შედგება.