რუსმა ალქაჯებმა პრეზიდენტ ვლადიმერ პუტინს მაგიური რიტუალი მიუძღვნეს, რომლის მიზანიც "მსოფლიოში ცხოვრების დონის გაუმჯობესებაა". როგორც ალქაჯების ლიდერი განმარტავს, რიტუალი ისე იყო დაგეგმილი, რომ მსოფლიოს გასაუმჯობესებელად მაგიურ ენერგია რუსეთიდან გაივლიდა. მისი მტკიცებით, რუსეთს პრეზიდენტის გარეშე ვერ წარადგენდნენ და სწორედ ასე იქცა "საერთო სიკეთისთვის ბრძოლა" პუტინის სადიდებელ რიტუალად.

ერთ-ერთი ალქაჯი ადგილობრივ მედიასთან საუბარში ხსნის, რომ ქვეყნის პრეზიდენტი რთულ მდგომარეობაშია და რიტუალიც ამიტომ გახდა საჭირო.

"გვინდა მხარი დავუჭიროთ ჩვენს პრეზიდენტს იმ ძალებით, რომელიც გაგვაჩნია. რთულია მისი მდგომარეობა იმიტომ, რომ ის იბრძვის და მას უნდა ქვეყანაში ყველაფერი კარგად იყოს. ის ებრძვის ყველას, ვინც მას თავს ესხმის და ჩვენ გვინდა ეს ბოროტები დადუმდნენ", — აცხადებს ალქაჯი ირინა.

ჟურნალისტის კითხვაზე, რას ფიქრობენ პუტინის მმართველობის შესახებ ალქაჯები პასუხობენ:

"აუცილებელია მთავრობის მხარდაჭერა და ვლადიმერ ვლადიმეროვიჩის, რა თქმა უნდა", — ალქაჯი იულიანა.

"მე არ მაქვს უფლება, როგორც ქვეყნის მოქალაქეს, რომ ვაკრიტიკო პრეზიდენტის ბრძანებულებები", — ალქაჯი ირინა.

"მე ყოველთვის მაკმაყოფილებს ის, ვინც ზემდგომია", — ალქაჯი აფროდიტა.

"ალქაჯების უძლიერესი იმპერია" ასე პოზიციონირებს ქალთა გაერთიანება, რომლებსაც მიაჩნიათ, რომ რიტუალებით სამყაროს ცვლილება შეუძლიათ. თუმცა, მათ რიტუალში სანთლები, თავის ქალები, ფოტოები ან პირადი ნივთები არ გვხვდება. ალქაჯები საკმარისად მიიჩნევენ შავ მანტიებსა და შელოცვების წიგნიდან წყევლის გამოთქმით კითხვას. წყევლა პუტინისთვის ავისმოსურნეებსაც შეხვდათ:

"ვინც ვნებს და ცუდს საუბრობს, სამუდამოდ და უკუნითი უკუნისამდე დაწყევლილ იყვნენ მტრები, მტრები დაიწყევლონ", — ერთხმად ამბობენ ალქაჯები. თუმცა არ აკონკრეტებენ ვინ არის პუტინის მტერი, რომლისგან დასაცავადაც მაგიური რიტუალი გახდა საჭირო.